QR Memlekettik qyzmet isteri jáne sybailas jemqorlyqqa qarsy is-qimyl agenttigi qorǵanys salasynda biýdjet qarjysyn jymqyrý faktisin anyqtady, dep xabarlaidy QazAqparat tilshisi.
Agenttiktiń resmi ókili Nurlan Jaxinniń aitýynsha, QR Qorǵanys ministrliginiń Qaraǵandy oblysy boiynsha áskerlerdi jaiǵastyrý bas basqarmasynyń laýazymdy tulǵalary biýdjet qarajatyn jymqyrǵan.
«Atap aitqanda, óndiristik-texnikalyq bólimniń basshysy bir aktsionerlik qoǵamyna qarasty merdiger uiymynyń ókilderimen sóz bailasyp, Priozersk qalasyndaǵy áskeri qalashyqta kúrdeli jóndeý jumystary boiynsha jalǵan aktilerdi rásimdegen. Sóitip, 209 mln teńgeni ysyrap etken. Atalǵan soma qurylys-ekonomikalyq sot saraptamasynyń qorytyndysy boiynsha anyqtaldy», - dedi N.Jaxin Astanada ótken baspasóz máslixatynda.
Aita keteiik, búgin agenttiktiń Túrkistan oblysy Ordabasy aýdanynyń ákimin paramen ustaý operatsiiasyna qatysty videony jariialady. Budan bólek, 2 mln teńgemen ustalǵan basqarma basshysynyń videosy da kórsetildi. Al Shyǵys Qazaqstan oblysynda Memlekettik kirister departamentiniń ókilderi paramen ustaldy.
