Qazaqstan Respýblikasynyń Qorǵanys ministrliginde Otan qorǵaýshylar kúni men Jeńis kúnine arnalǵan saltanatty jinalys ótti, dep habarlaidy "Ult aqparat".
Qorǵanys ministri general-leitenant Nurlan Ermekbaev bastaǵan Qazaqstan Respýblikasy Qarýly Kúshteriniń joǵary basshylyq quramy qyzmettik boryshyn atqarý kezinde qaza tapqan áskeri qyzmetshilerdi bir minýt únsizdikpen, «Máńgi esimizde» monýmentine gúl shoqtaryn qoiýmen eske aldy.
Jeke quram aldynda sóilegen sózinde Qorǵanys vedomstvosynyń basshysy áskeri qyzmetshiler jaýyngerlik ázirliktiń joǵary deńgeiin udaiy qoldai otyryp, Otan aldyndaǵy konstitýtsiialyq boryshyn bedeldi oryndaitynyn atap ótti.
2020 oqý jylynyń ózinde Qarýly Kúshterde 60 myńnan astam maman daiarlanyp, 74 myńnan astam shara, onyń ishinde brigadalyq taktikalyq jáne keme oqý-jattyǵýlary, tájiribelik atystary, dalalyq shyǵýlar, ushý aýysymdary, súńgýirlik jattyǵýlar, parashiýtpen sekirýler ótkizildi.
General-leitenant Nurlan Ermekbaev QR Prezidenti – Qarýly Kúshterdiń Joǵarǵy Bas qolbasshysy Qasym-Jomart Toqaevtyń áskerlerge basshylyq etý men olardy basqarý, olardyń joǵary jaýyngerlik ázirligin qoldaý jáne memlekettiń qorǵanys qabiletin qamtamasyz etý isinde qol jetkizgen tabystarǵa joǵary baǵa berilgenin erekshe atap ótti.
Jýyrda Aqordada Memleket basshysy Qorǵanys ministriniń orynbasary Rýslan Shpekbaev pen Bas shtab bastyǵynyń birinshi orynbasary Marat Qusaiynovqa joǵary ofitserler quramynyń kezekti «general-leitenant» áskeri ataǵyn tabys etti.
Al Bas shtab bastyǵynyń orynbasary Serik Borambaev, «Batys» jáne «Astana» óńirlik qolbasshylyqtary áskerleriniń qolbasshylary Nurlan Aldiiarov pen Mereke Kúshekbaev, «Shyǵys» óńirlik qolbasshylyǵy shtabynyń bastyǵy Qýanyshbek Úshtaev, Qarýly Kúshterdiń Tyl bastyǵy Almaz Ahmadiev «general-maior» áskeri ataǵyn ielendi.
Prezidenttiń Jarlyǵymen Qarýly Kúshterdiń 23 áskeri qyzmetshisi men azamattyq personal ókilderi memlekettik marapatqa laiyqty dep tanyldy.
– Qarýly Kúshterdiń barlyq jeke quramynyń qyzmetine berilgen osyndai baǵa bizge úlken jaýapkershilik júkteidi, - dedi Qorǵanys ministri.
Saltanatty shara sońynda Qorǵanys ministri memlekettik nagradalar men merziminen buryn berilgen áskeri ataqtardy tabystady.
