QR Qarýly kúshterinde jeke quramnyń qaza bolýy men jaraqattaný sebebin anyqtaityn, onyń nátijesimen «áskerde nóldik ólim-jitim» sharalar keshenin ázirleitin jumys toby quryldy. Qorǵanys ministri general-polkovnik Rýslan Jaqsylyqov jazǵy oqý kezeńiniń bastalýyna bailanysty ótken keńeste osyndai tapsyrma berdi, dep habarlaidy QazAqparat.
Qorǵanys vedomstvosynyń basshysy jaýyngerlik daiarlyqty qaita jańǵyrtý aiasynda sabaqtardy sapaly uiymdastyrýǵa, jeke quramnyń oqý baǵdarlamalaryn tolyqqandy iske asyrýyna, oqytý protsesine barlyq áskeri qyzmetshilerdi qatystyrýǵa nazar aýdardy.
Áskeri qyzmet qaýipsizdigi jeke másele retinde kóterildi. Rýslan Jaqsylyqov áskeri qyzmetshilerdiń jaraqattanýy men qaza bolýy máselelerine toqtaldy. Ol beibit ýaqytta mundai faktilerge jol berilmeýi tiistigin jáne barlyq laýazymdy tulǵalar mundai jaǵdailardy boldyrmaý úshin qajetti shara qabyldaýy kerektigin atap ótti.
Áskeri qyzmettiń tutastai alǵanda, qaýip tóndiretin kóptegen faktorlarmen bailanysty ekendigi aityldy. Sonymen qatar armiia qoǵamnyń bir bóligi bolǵandyqtan, birqatar jaǵymsyz qubylystar azamattyq ómirden Qarýly kúshterdiń qataryna aýysyp jatady. Osyǵan bailanysty jeke quramnyń qaza bolýy men jaraqattaný sebepterine jan-jaqty taldaý júrgizetin «áskerde nóldik ólim-jitim» boiynsha sharalar keshenin ázirleitin jumys tobyn qurý tapsyryldy.
Baǵdarlamany ázirleýge Qorǵanys ministrliginiń laýazymdy tulǵalaryn, ardagerler uiymdaryn, bilim berý jáne meditsina mekemeleriniń ókilderin, psihologtardy da tartý qajet. Osy baǵdarlamany iske asyrýdyń negizgi nysanaly indikatory Qarýly kúshterde qaza tabý faktilerin tolyq joiý bolýǵa tiis.
Keńes barysynda Qorǵanys ministri tilsiz jaýdy sóndirip, jalyn ishinde qalǵan adamdy qutqarý kezinde batyldyq tanytqan kelisimshart boiynsha áskeri qyzmetshiler efreitorlar Abylaihan Omarov pen Talǵat Ábjanovty «El qorǵany» vedomstvolyq medalimen marapattady. Ministr Rýslan Jaqsylyqov atalǵan áskeri qyzmetshilerdiń tótenshe jaǵdaida shapshań qimyldap, der kezinde kómekke kele alǵan erligin úlgi etti.
Eske salaiyq, biylǵy sáýir aiynyń sońynda keteiik, Jambyl oblysyndaǵy Gvardeisk áskeri qalashyǵyndaǵy gospitalde merzimdi áskeri qyzmetke shaqyrylǵan Álibek Qalbai qaza boldy. Prezident sarbazdyń óliminiń sebebin anyqtaýdy tapsyrdy.
Mańǵystaý oblysynda shekara qyzmetinde áskeri boryshyn ótep júrgen sarbaz óz-ózine qol saldy. Onyń qaiǵyly oqiǵa aldynda jazǵan hattary qosa jariialandy. Memleket basshysy osyndai keleńsizdikterdiń sebebin tergep-tekserý, áskeri qyzmetshiler arasyndaǵy zańsyzdyqtardy joiý jáne keleshekte áskerdegi mundai teris is-áreketterdi boldyrmaý úshin óziniń kómekshisi – Qaýipsizdik Keńesiniń hatshysy Ǵizat Nurdáýletovtiń basshylyǵymen arnaiy komissiia qurýdy tapsyrdy.
Budan bólek, Aqtaýdaǵy áskeri bólimde merzimdi boryshyn ótep júrgen sarbaz ainalada bolyp jatqan oqiǵalarǵa túsiniksiz reaktsiia tanytyp, ózimen-ózi sóilese bastaǵan. Oqiǵaǵa qatysty áskeri politsiia tekserý júrgizip jatyr.
Al biylǵy mamyr aiynyń sońynda Balqashta áskeri qyzmetshi áriptesine oq atty.
