Áleýmettik jelilerde Ýkrainada bolyp jatqan jaǵdaiǵa bailanysty Qazaqstan Resei jaǵyna shyqqysy keletini týraly jazylyp jatyr. Sonymen qatar, QR Qorǵanys ministrligi men RF Qarýly Kúshteri Ýkrainaǵa qazaqstandyq áskeri tehnika men jaýyngerler jiberý týraly kelissóz júrgizip jatyr degen aqparat taralyp júr. Degenmen bul - jalǵan aqparat, - dep habarlaidy "Ult aqparat" stopfake.kz saityna silteme jasap.
Bul mátinniń avtory Tájikstan men Qyrǵyzstan Reseige áskeri kómek kórsetýge daiyn ekendikterin «qupiia» deńgeide jetkizgenin habarlaidy.
Qorǵanys ministrligi Reseige tehnika jetkizý nemese Ýkrainaǵa ásker jiberý týraly kelissózder týraly aqparat pen qaýesetti joqqa shyǵardy.
– Áleýmettik jeliler men messendjerlerde taraǵan qazaqstandyq áskeri qyzmetshiler men áskeri tehnikany Ýkrainaǵa jiberý týraly aqparat shyndyqqa sáikes kelmeitinin habarlaimyz. Beibitshilik pen qaýipsizdikti qoldaý jónindegi halyqaralyq mindettemelerdi oryndaý úshin Qazaqstan Respýblikasy Qarýly kúshteriniń áskeri kontingentin jiberý týraly sheshimdi el Prezidentiniń tiisti usynysy negizinde Parlament qabyldaidy. Parlamenttiń tiisti qaýlysy qabyldanǵanǵa deiin Qorǵanys ministrliginiń áskeri kontingentti qandai da bir memleketke jiberýge ókilettiligi joq. Qorǵanys ministrligi atalǵan másele boiynsha kelissózder júrgizip jatqan joq.
Jeke quramdy aýystyrýǵa, oqytýǵa, jattyqtyrýǵa qatysty Qazaqstan Qarýly Kúshteriniń jaýyngerlik ázirligi men jaýyngerlik daiarlyǵyn arttyrý sharalary josparly túrde júrgiziledi. Ústimizdegi jyldyń 25 aqpany men 3 naýryzy aralyǵynda Qaraǵandydan Gvardeisk garnizonyna, sondai-aq Almatydan Aqtaý garnizonyna áskeri tehnika jiberilgenin eske salamyz.
2022 jylǵy 1-4 naýryz aralyǵynda Shymkentten Tarazǵa, Túrkistanǵa, «Aisha-bibi» poligonyna jáne keri baǵytta Qarýly kúshterge tiesili tehnikalardyń qozǵalysy josparlanyp otyr.
Atalǵan kezeńde jóndeý jumystaryn júrgizý úshin áskeri tehnikalardy temir jol kóligimen Batys Qazaqstannan eldiń ońtústik bóligine josparly túrde jetkizý júzege asyralady, – dep habarlady vedomstvodan.
Sondai-aq Ýkraina men Resei arasyndaǵy qaqtyǵysqa Qazaqstannyń, Tájikstan men Qyrǵyzstannyń qatysýy týraly boljamdarǵa qaishy keletin basqa da faktiler bar.
Birinshiden, QR Qorǵanys ministrligi qazaqstandyq tehnika men áskerilerdi Ýkrainaǵa jóneltilýin joqqa shyǵardy.
– Qazaqstan áskeri qyzmetshilerin Ýkrainaǵa nemese odan basqa elge jiberý týraly suraý túsken joq jáne tiisti túrde qaralyp ta jatqan joq, – dep habarlady vedomstvodan.
Ekinshiden, QR Prezidenti Qasym-Jomart Toqaev Resei men Ýkrainany kelissózder arqyly ortaq kelisimge qol jetkizýge shaqyryp, ásker nemese tehnika jóneltýge qatysty kelisim bildirmedi.
Sonymen qatar, buqaralyq aqparat quraldarynda jáne resmi resýrstarda Qazaqstan, Qyrǵyzstan nemese Tájikstan Reseige áskeri qoldaý kórsetýge daiyn ekendigi týraly aqparat jariialanǵan joq. Demek, atalǵan elder Ýkrainadaǵy shieleniske qatysýǵa nietti degen pikirler qazirgi faktilerge qaishy keletin negizsiz qaýeset bolyp tabylady.
