Qazaqstannyń Qorǵanys ministrligi Qyzylorda oblysyndaǵy MI-8 tikushaǵynyń apatqa ushyraýyna bailanysty málimdeme jasady.
"Biyl 27 naýryzda QR Qarýly kúshteri tikushaǵynyń apatqa ushyraýy saldarynan áskeri boryshyn óteý kezinde borttaǵy 13 áskeri qyzmetker oqý-jattyǵýlar barysynda qaza tapty. Qazaqstan Qarýly kúshteriniń búkil jeke quramy qaza tapqan jaýynger joldastarynyń týǵan-týystary men jaqyndaryna qaiǵyryp kóńil aitady", - delingen áskeri vedomstvonyń málimdemesinde.
Qorǵanys ministrligi qaza bolǵan áskerilerdiń otbasyna moraldyq jáne materialdyq kómek kórsetetin bolady.
Eske sala ketsek, keshe "Altyn jebe" atty arnaýly bólimderdiń oqý-jattyǵýy aiasynda Aqtaýdan Shymkentke attanǵan MI-8 tikushaǵy Qyzylorda oblysynda apatqa ushyrady. Bortta 13 ekipaj múshesi men jolaýshy bolǵan. Olardyń aty-jóni jelide jariialandy.
Qaiǵyly oqiǵany tergeýdi Qorǵanys jáne Ishki ister ministrlikteri qolǵa aldy.
Qazaqstan Prezidenti Qasym-Jomart Toqaev qaza tapqandardyń otbasyna kóńil aitty.
