Qazaqstan qorǵanys ministriniń orynbasary general-maior Baqyt Qurmanbaev ómirden ótti.
"2020 jyldyń 14 shildesinde Qazaqstan Respýblikasy qorǵanys ministriniń orynbasary general-maior Baqyt Januzaquly Qurmanbaev dúnieden ozdy", - dep habarlady vedomstvonyń resmi saity.
Marqumnyń artynda áieli men eki balasy qaldy. Qurmanbaevtyń neden qaitys bolǵany naqtylanbaǵan.
Qorǵanys ministrliginiń basshylyǵy men áskeri qyzmetshileri general-maiordyń mezgilsiz qaitys bolýyna bailanysty týystaryna qaiǵyryp kóńil aitady.
Qurmanbaev Arys qalasynda tótenshe jaǵdai saldaryn joiýda aitarlyqtai úles qosyp, pandemiiamen kúrestiń alǵashqy kúnderinen bastap infektsiianyń taralýyna qarsy is-sharalardy uiymdastyrý men qamtamasyz etýge belsendi atsalysty, dep atap ótti vedomsto.
Baqyt Qurmanbaev 1970 jyly 21 qyrkúiekte Óskemende dúniege kelgen.
1993 jyly Ál-Farabi atyndaǵy Qazaq memlekettik ýniversitetin támamdady. 2005 jyly Resei Qurlyq áskerleri áskeri áýe shabýylyna qarsy qorǵanys áskeri akademiiasynda bilim alyp, al 2008 jyly Resei Qarýly kúshteri Bas shtaby Áskeri akademiiasynyń joǵary akademiialyq kýrstaryn bitirdi.
Áskeri salada qondyrǵylardy qosý vzvodynyń, zenittik-zymyran batareiasynyń komandirinen bastap ár jyldary qorǵanys ministrliginde basshylyq laýazymdardy, sonymen qatar, Qazaqstan Qaýipsizdik keńesi áskeri qaýipsizdik jáne qorǵanys bóliminiń meńgerýshisi qyzmetin atqardy.
2017 jyly 6 mamyrda prezident jarlyǵymen oǵan "general-maior" áskeri ataǵy berildi.
2019 jyly sáýir aiynda Qurmanbaev Qazaqstan qorǵanys ministriniń orynbasary bolyp taǵaiyndaldy. Materialdyq-tehnikalyq qamtamasyz etý, qorǵanys ónerkásip keshenimen ózara is-qimyl jasaý, qarý-jaraq jáne áskeri tehnika, sondai-aq, tyldyq jáne meditsinalyq qamtamasyz etý máselelerine jetekshilik etti.
Qyzmet atqarǵan kezeńderde II dárejeli "Aibyn" jáne II dárejeli "Danq" ordenderimen marapattalǵan.
