Foto: gov.kz
Qorǵanys ministri Rýslan Jaqsylyqov Májilis otyrysynan shyqqan soń jýrnalisterdiń suraǵyna jaýap berip, ulyn áskerge jiberýge daiyn ekenin málimdedi, dep habarlaidy "Ult aqparat".
"Qazir onyń jasy 20-da. Ázirge stýdent. Oqý ornyn támamdaǵan soń, áskerge ózim qolynan jetektep aparamyn. Otan aldyndaǵy boryshyn óteý – onyń qasietti mindeti.
Al qai baǵytty tańdaitynyn ózi kóredi. Arnaiy mamandandyrylǵan bólimsheler nemese barlaý qyzmetine beiimi bar sekildi", - dedi Jaqsylyqov Májilis kýlýarynda.
Aita keteiik, búgin Májilis rezervtegi qyzmet týraly zań jobasyn birinshi oqylymda maquldady. Qorǵanys ministrligi rezervtegi qyzmetti 2025 jyly qurýdy josparlap otyr. Alǵashqy kezeńde 2 myńǵa jýyq rezervisti shaqyrý josparlanǵan.
Rezervistermen kelisimshart erikti túrde úsh jylǵa jasalady. Daiarlyq bir jylda eki aidan aspaidy. Jiyn 30 kún, sabaq ai saiyn eki-úsh kún bolady. Rezervtegi qyzmetke shaqyrylǵandarǵa ai saiyn eń tómengi jalaqy, al jiyn kezinde ortasha jalaqy tólenedi.
video: halyquni.media / Instagram
