Qorǵanys ministri general-leitenant Nurlan Ermekbaev Qazaqstan Respýblikasy Qarýly Kúshteri Áskeri politsiia bas basqarmasy bastyǵy bolyp jańadan taǵaiyndalǵan polkovnik Marat Dosanuly Nurymbetti tanystyrdy, dep habarlaidy QR Qorǵanys ministrliginiń baspasóz qyzmeti.
Polkovnik Marat Nurymbet – Qazaq memlekettik zań institýtynyń túlegi. Ol Ulttyq qaýipsizdik komiteti men Memlekettik kúzet qyzmeti júiesinde túrli basshylyq qyzmetter atqarǵan, onyń ishinde qarsy barlaý jáne jedel-izdestirý sharalary terroristik aktilerge qarsy is-qimyldy uiymdastyrýda tájiribesi mol.
Áskeri politsiia organdaryna júktelgen mindetterdiń mańyzdylyǵyn eskere otyryp, qorǵanys vedomstvosynyń basshysy áskeri politsiia bas basqarmasynyń bastyǵyn jeke ózi tanystyrdy.
Ministr atap ótkendei, «búginde qorǵanys vedomstvosynda basymdyqtardyń arasynda eki baǵyt bar: olar sybailas jemqorlyqqa qarsy
is-qimyl jáne qyzmet qaýipsizdigin qamtamasyz etý. Bul mindetter kóbinese áskeri politsiiaǵa júktelgen». Ótken jyly áskeri politsiia bas basqarmasynyń qurylymynda eki jańa basqarma quryldy. Olarǵa sybailas jemqorlyqqa qarsy is-qimyl jáne áskeri qyzmet qaýipsizdiginiń jai-kúiin baqylaý jónindegi mindetter júktelgen.
Ministrdiń aitýynsha, basqa kúshtik vedomstvolardan aiyrmashylyǵy, Qarýly Kúshterde ózindik qaýipsizdik qyzmeti joq, biraq Qarýly Kúshter basqa memlekettik organ siiaqty birqatar baqylaýshy jáne qadaǵalaýshy
qurylymdardyń jiti nazarynda. Bul áskeri qyzmetshiler qatarynyń tártip buzbaýyna joǵary talaptar qoiady.
Sybailas jemqorlyqqa qarsy qabyldanǵan sharalar nátijesinde 2015-2019 jyldar aralyǵynda Qarýly Kúshterdegi sybailas jemqorlyq qatysty qylmystar sany tórt esege deiin azaidy. 2019 jyly barlyǵy 6 sybailas jemqorlyq qylmysyna jol berilse, al 2015 jyldan bastap 2018 jylǵa deiin bul san 17-den 34-ke deiin bolǵan. Sonymen qatar, aǵymdaǵy jyly mundai qylmystardyń ósýine jol berilgen. 2020 jyldyń jeti aiynda sybailas jemqorlyq qylmystar sany 25-ti qurady. Alaida, olardyń kópshiligi boiynsha túpkilikti protsessýaldyq sheshim qabyldanǵan joq.
Aita ketý kerek, bul qylmystardyń somasy salystyrmaly túrde az - negizinen 6 myńnan 50 myńǵa deiin, 200 myń teńge. Bul qylmystar biýdjet qarajatymen bailanysty bolmaǵan.
Qorǵanys ministrliginde qazirgi ýaqytta kez kelgen quqyq buzýshylyqqa nóldik tózimdilikti tárbieleý boiynsha jumys júrgizilýde.
Ministr 2017 jyldyń qazan aiynan bastap osy ýaqytqa deiin áskeri politsiia bas basqarmasynyń bastyǵy qyzmetin atqaryp, zeinetkerlikke shyqqan polkovnik Baýyrjan Lekerovke alǵysyn bildirdi.
