Ońtústik Qazaqstan oblystyq korei etnomádeni birlestiginiń uiymdastyrýymen «Qazaqstan halqy Assambleiasy» ǵimaratynda korei etnosynyń tili, mádenieti jáne salt-dástúri kúni atalyp ótti. Bul mereke korei etnosynyń Qazaqstanǵa kúshtep qonystandyrylǵanyna 80 jyl tolýyna orai uiymdastyrylyp otyr.
Merekelik is-sharanyń ashylýynda sóz alǵan oblys ákiminiń orynbasary Ulasbek Sádibekov oblys ákimi, OQO Qazaqstan halqy Assambleiasynyń tórǵasy Janseiit Túimebaevtyń saltanatty jiynǵa qatysýshylarǵa arnalǵan quttyqtaýyn oqyp berdi. Onda qoǵamdyq kelisim men jalpyulttyq birlik salasyndaǵy memlekettik saiasatty iske asyrýda korei etnomádeni birlestiginiń qosyp kele jatqan súbeli úlesi atalyp ótilgen.
Jiynda Ulasbek Sádibekuly memleketimizdiń saiasi, ekonomikalyq jáne mádeni damýyna laiyqty úles qosyp júrgen korei etnosynyń ókilderine oblys ákiminiń alǵys hatyn saltanatty túrde tabys etti.
Merekelik basqosýda OQO Qazaqstan halqy Assambleiasy tóraǵasynyń orynbasary M.Qalmuratov, oblysymyzdyń qurmetti azamaty M. Saparbaev, oblystyq Analar keńesiniń tóraiymy Asma Qalybekova syndy birqatar azamattar sóz sóilep, birligi bekem eldiń ǵana berekesi artyp, mereii ústem bolatyndyǵyn atap ótti.
Qazaq eline aqedil alǵysyn bildirgen oblystyq korei etnomádeni birlestiginiń tóraiymy Roza Pak árbir korei etnosy Qazaqstandy óz Otanym dep sanaitynyn jetkizdi.
«Qiyn jyldar kezeńinde qazaq halqynyń bizdiń ata-babalarymyzdy ystyq yqylaspen qarsy alǵanyn alǵys sezimmen eske alamyz. Qazaq halqynyń darhandyǵynyń arqasynda ósip-óndik. Búginde birligi jarasqan, bolashaǵy zor memlekette ómir súrip jatyrmyz. Ortaq Otanymyzdyń kórkeiýi úshin aianbai eńbek etetin bolamyz,- dedi Roza Pak.
Saltanatty sharada etnomádeni birlestikterdiń janyndaǵy shyǵarmashylyq ujymdar daiyndaǵan kontserttik baǵdarlama kópshiliktiń nazaryna usynyldy.
Aita keterligi, 1937 jyldary 100 myńdai Qiyr Shyǵys káristeri elimizdiń ár aimaǵyna kúshtep jer aýdarylǵan bolatyn. Búginde elimizde 100 myńnan astam korei diasporasy ómir súrýde. Al Ońtústik Qazaqstan oblysynda 9 myńnan astam korei etnosynyń ókilderi turady. Óńirimizde korei etnomádeni birlestigi 1989 jyly qurylyp, 1997 jyly «Qazaqstan koreileri qaýymdastyǵy» respýblikalyq qoǵamdyq birlestiginiń filialy retinde qaita tirkeýden ótti. Etnomádeni birlestik janynan ardagerler alqasy men jastar qanaty, jeksenbilik mektep, «Maranbon» folklorlyq ansambli jáne Kentaý qalasy men Maqtaral, Saryaǵash, Sairam, Tólebi aýdandarynda filialdary jumys isteidi. Bul birlestik el birligin bekemdeý, turaqtylyqty saqtaý baǵytynda atqarylǵan keshendi is-sharalardyń janynan tabylyp keledi.
OQO ákiminiń baspasóz qyzmeti
