Koreialyq dárigerler Túrkistan oblysynda turatyn jeti ailyq sábige tegin ota jasap berdi. Qaiyrymdylyq sharasy «Sýn-Chhýn-Hian» klinikasy (Ońtústik Koreia) men Túrkistan oblystyq densaýlyq saqtaý basqarmasy arasynda qol qoiylǵan memorandým aiasynda júzege asty. Nurken Elshibek esimdi náreste qazir Pýchhon qalasynda ornalasqan «Sýn-Chhýn-Hian» klinikasynda em qabyldaýda.
Túrkistan oblystyq densaýlyq saqtaý basqarmasynyń málimetinshe, naýqas bala joǵarǵy erinniń bitpeýi, iaǵni «qoian jyryq» diagnozymen týylǵan. Sábidiń anasy Nurila Isaeva balasyna Koreiada 10 myń dollarlyq operatsiia jasatýdy tipti armandamaǵanyn da aitady.
«Ulymnyń jaǵdaiyn Allanyń bergen synaǵy dep qabyldadyq. Aýyr bet aqaýymen ómir súrýge úirenýge týra keldi. Ýaqyt óte bul baladan góri meniń janyma qatty batty. Sebebi, aiaǵym aýyr kezde qatty tumaýratyp, uzaq emdelýge týra keldi. Keiin dárigerler balamnyń keseline osy áser etýi múmkin dep boljady. Ýaqyt óte kele tynys alýy aýyrlap, emgende súttiń kóbi dalaǵa aǵyp ketetin boldy. Shashalyp qala beredi. Ishi keýip ketedi. Otyrǵyzyp emizip, túnimen tunshyǵyp qalmasyn dep qolda ustaitynbyz. Operatsiiany jasatý úshin barlyq jaqtan surastyryp, kezekke turdyq. Otany alty aidan keiin jasatý kerek boldy. Osy kezde bizge Koreia mamandarynyń qaiyrymdylyq sharasy týraly aitty. Mundai múmkindiktiń bola bermeitinin túsinip, Túrkistan oblysynyń dárigerlerimen osynda keldik»,- deidi sábidiń anasy Nurila Isaeva.
Jekemenshik klinika naýqas balanyń meditsinalyq tekserýin, operatsiiasy men barlyq shyǵyndardy óz moinyna alǵan. Mamandardyń sózinshe, ota bes saǵatqa sozylǵan. Aýyr sanalatyn operatsiiany eń myqty plastikalyq hirýrg, professor Kim Eng Pe jasaǵan. Operatsiia sátti ótkennen keiin «Sýn-Chhýn-Hian» ýniversiteti janyndaǵy Pýchhon gospitali meńgerýshisiniń orynbasary, professor Min Geng De kishkentai naýqastyń jaǵdaiyn surap kelip, oǵan syilyq tabys etti.
Aita keteiik, ekijaqty kelissózder nátijesinde kúngeidiń aq halattylary atalǵan klinikaǵa baryp, sheteldik dárigerlerden dáris aldy. Sondai-aq, tájiribe almasty. Osy ýaqyt ishinde 50-ge jýyq dáriger, meditsinalyq qyzmetker, anasteziologtar men hirýrgtar, sondai-aq ginekologtar aqysyz bir ailyq oqý kýrsyna baryp qaitty.
Tek ótken jyly Túrkistan oblysynda 78 balaǵa osyndai ota jasaldy. Aǵymdaǵy jyly ondai naýqastardyń sany 108-ge jetken.
