كورەيالىق دەرٸگەرلەر تٷركٸستان وبلىسىندا تۇراتىن جەتٸ ايلىق سەبيگە تەگٸن وتا جاساپ بەردٸ. قايىرىمدىلىق شاراسى «سۋن-چحۋن-حيان» كلينيكاسى (وڭتٷستٸك كورەيا) مەن تٷركٸستان وبلىستىق دەنساۋلىق ساقتاۋ باسقارماسى اراسىندا قول قويىلعان مەموراندۋم اياسىندا جٷزەگە استى. نۇركەن ەلشٸبەك ەسٸمدٸ نەرەستە قازٸر پۋچحون قالاسىندا ورنالاسقان «سۋن-چحۋن-حيان» كلينيكاسىندا ەم قابىلداۋدا.
تٷركٸستان وبلىستىق دەنساۋلىق ساقتاۋ باسقارماسىنىڭ مەلٸمەتٸنشە, ناۋقاس بالا جوعارعى ەرٸننٸڭ بٸتپەۋٸ, ياعني «قويان جىرىق» دياگنوزىمەن تۋىلعان. سەبيدٸڭ اناسى نۇريلا يساەۆا بالاسىنا كورەيادا 10 مىڭ دوللارلىق وپەراتسييا جاساتۋدى تٸپتٸ ارمانداماعانىن دا ايتادى.
«ۇلىمنىڭ جاعدايىن اللانىڭ بەرگەن سىناعى دەپ قابىلدادىق. اۋىر بەت اقاۋىمەن ٶمٸر سٷرۋگە ٷيرەنۋگە تۋرا كەلدٸ. ۋاقىت ٶتە بۇل بالادان گٶرٸ مەنٸڭ جانىما قاتتى باتتى. سەبەبٸ, اياعىم اۋىر كەزدە قاتتى تۇماۋراتىپ, ۇزاق ەمدەلۋگە تۋرا كەلدٸ. كەيٸن دەرٸگەرلەر بالامنىڭ كەسەلٸنە وسى ەسەر ەتۋٸ مٷمكٸن دەپ بولجادى. ۋاقىت ٶتە كەلە تىنىس الۋى اۋىرلاپ, ەمگەندە سٷتتٸڭ كٶبٸ دالاعا اعىپ كەتەتٸن بولدى. شاشالىپ قالا بەرەدٸ. ٸشٸ كەۋٸپ كەتەدٸ. وتىرعىزىپ ەمٸزٸپ, تٷنٸمەن تۇنشىعىپ قالماسىن دەپ قولدا ۇستايتىنبىز. وپەراتسييانى جاساتۋ ٷشٸن بارلىق جاقتان سۇراستىرىپ, كەزەككە تۇردىق. وتانى التى ايدان كەيٸن جاساتۋ كەرەك بولدى. وسى كەزدە بٸزگە كورەيا ماماندارىنىڭ قايىرىمدىلىق شاراسى تۋرالى ايتتى. مۇنداي مٷمكٸندٸكتٸڭ بولا بەرمەيتٸنٸن تٷسٸنٸپ, تٷركٸستان وبلىسىنىڭ دەرٸگەرلەرٸمەن وسىندا كەلدٸك»,- دەيدٸ سەبيدٸڭ اناسى نۇريلا يساەۆا.
جەكەمەنشٸك كلينيكا ناۋقاس بالانىڭ مەديتسينالىق تەكسەرۋٸن, وپەراتسيياسى مەن بارلىق شىعىنداردى ٶز موينىنا العان. مامانداردىڭ سٶزٸنشە, وتا بەس ساعاتقا سوزىلعان. اۋىر سانالاتىن وپەراتسييانى ەڭ مىقتى پلاستيكالىق حيرۋرگ, پروفەسسور كيم ەنگ پە جاساعان. وپەراتسييا سەتتٸ ٶتكەننەن كەيٸن «سۋن-چحۋن-حيان» ۋنيۆەرسيتەتٸ جانىنداعى پۋچحون گوسپيتالٸ مەڭگەرۋشٸسٸنٸڭ ورىنباسارى, پروفەسسور مين گەنگ دە كٸشكەنتاي ناۋقاستىڭ جاعدايىن سۇراپ كەلٸپ, وعان سىيلىق تابىس ەتتٸ.
ايتا كەتەيٸك, ەكٸجاقتى كەلٸسسٶزدەر نەتيجەسٸندە كٷنگەيدٸڭ اق حالاتتىلارى اتالعان كلينيكاعا بارىپ, شەتەلدٸك دەرٸگەرلەردەن دەرٸس الدى. سونداي-اق, تەجٸريبە الماستى. وسى ۋاقىت ٸشٸندە 50-گە جۋىق دەرٸگەر, مەديتسينالىق قىزمەتكەر, اناستەزيولوگتار مەن حيرۋرگتار, سونداي-اق گينەكولوگتار اقىسىز بٸر ايلىق وقۋ كۋرسىنا بارىپ قايتتى.
تەك ٶتكەن جىلى تٷركٸستان وبلىسىندا 78 بالاعا وسىنداي وتا جاسالدى. اعىمداعى جىلى ونداي ناۋقاستاردىڭ سانى 108-گە جەتكەن.
