QR Syrtqy ister ministrligi Ońtústik Koreiaǵa oqýǵa baryp, deportatsiiaǵa ushyraǵan stýdentterge qatysty pikir bildirdi, dep habarlaidy QazAqparat tilshisi.
Buǵan deiin Eýraziia telearnasy jeke kompaniia arqyly Ońtústik Koreiaǵa oqý kýrsyna ketken qazaqstandyq stýdentterdiń zańsyz kelimsekter retinde keri qaitarylǵanyn habarlaǵan bolatyn.
«Biz bul oqiǵadan habardarmyz. Bir top stýdent Koreiadaǵy Qazaqstan Elshiligine kómekke júgindi», - dep jaýap berdi QR Syrtqy ister ministrliginiń resmi ókili Aibek Smadiiarov.
Belgili bolǵandai, Qazaqstan Respýblikasynyń Úkimeti men Koreia Respýblikasynyń Úkimeti arasyndaǵy 2014 jylǵy 29 qarashadan bastap kúshine engen vizalyq talaptardy ózara joiý kelisimine sáikes, ulttyq pasporty bar, jumys isteýdi, oqýdy nemese turýdy josparlamaǵan eki eldiń azamattary 30 kúnge deiin baryp-kele alady.
«Bul jaǵdaida qazaqstandyq stýdentter Ońtústik Koreianyń kóshi-qon zańdaryn buzdy jáne elden qýyldy. Stýdentter nemese sapardy uiymdastyrǵan kompaniia Ońtústik Koreianyń Qazaqstandaǵy Elshiligimen bailanysyp, bar jaǵdaidy túsindirýi tiis. Ári qarai máseleniń sheshilýi korei tarapynyń quzyrynda bolmaq», - deidi QR SIM baspasóz hatshysy.
QR Syrtqy ister ministrligi Qazaqstan azamattaryna barǵaly jatqan memlekettiń zańymen muqiat tanysýǵa keńes beredi.
