Koreia Qazaqstanmen vizalyq talaptardan bas tartý týraly kelisimdi jalǵastyrmaýy múmkin. Bul týraly búgin QR Syrtqy ister ministrligi Konsýldyq qyzmet departamentiniń direktory Ardaq Mádiev málimdedi, dep habarlaidy "Ult aqparat" QazAqparat agenttigine silteme jasap.
«Sońǵy ýaqytta bizdiń azamattardyń Koreia Respýblikasyna saparlaýynda úlken qiyndyqtar týyndap jatyr. Bar másele - Qazaqstannan Koreiaǵa zańsyz jumys kúshin jetkizetin arnalardyń uiymdastyrylýy», - dedi Ardaq Mádiev.
Atap ótken jón, Qazaqstanmen Koreia arasyndaǵy vizasyz rejim arqyly Koreiaǵa jumysqa turýǵa, oqýǵa barýǵa,turaqty mekendeýge jáne missionerlik maqsatpen barýǵa bolmaidy. Osyǵan qaramastan, Qazaqstannyń kóptegen azamattary Koreiaǵa vizasyz rejimmen baryp, jumysqa ornalasyp, turaqtap qalǵysy keledi jáne Koreiada Qazaqstannan kelgen zańsyz migranttar sany kúrt ósken. Sol sebepti, Koreia Respýblikasynyń kóshi-qon organdary Qazaqstan azamattaryna qatysty tekserýdi kúsheitken.
«Ókinishke orai, vizasyz rejim týraly kelisimge qol qoiylǵan soń, QR azamattaryna Koreia aýmaǵyna kirýge ruqsat bermeý jaǵdailary jiilep ketti. Bul atalǵan kelisim arqyly Koreiaǵa baryp, sonda turaqtap qalǵan zańsyz migranttardyń kóbeiýimen bailanysty. Olar - zańsyz eńbek migranttary. Bul kelisim kúshine enbei turǵanda qazaqstandyq zańsyz kelýshiler sany 300-den sál ǵana asatyn. Al kelisim kúshine engen eki jyl ishinde bul kórsetkish edáýir ulǵaidy. Koreia Respýblikasynyń kóshi-qon qyzmetiniń derekterine sáikes, Qazaqstannan kelgen zańsyz eńbek migranttarynyń sany 6 myńǵa jetti. Iaǵni, bastapqy kórsetkishten 20 esege kóp. Osy sebepti, koreialyq kóshi-qon qyzmeti qazaqstandyq azamattardy deportatsiialaý boiynsha shara qabyldai bastady», - dep túsindirdi Ardaq Mádiev.
QR SIM departament basshysynyń aitýynsha, qazirgi ýaqytta vizasyz rejim týraly kelisimniń kúshin joiý týraly másele qoiylyp otyr.
«Jalpy alǵanda, kelisimniń taǵdyry qyl ústinde tur. Bizdiń azamattardyń Koreiaǵa emin-erkin barýy úshin, Koreiamen osy kelisimge qol qoiý úshin qansha kúsh-jiger salynyp edi. Biraq, zańsyz migranttar sanynyń kóp bolýy kelisimdi ári qarai jalǵastyrýǵa kedergi keltirýde», - dedi A.Mádiev.
