Jambyl oblysy Qordai aýdandyq soty aqpanda osy aýdanda bolǵan ultaralyq janjalǵa sebep boldy delingen joldaǵy kikiljińge qatysty sot úkimin oqydy.
Sot aiyptalýshy Qordai aýdany Sortóbe aýylynyń turǵyny 27 jastaǵy Marat Iýnhýdy "Buzaqylyq" jáne "Densaýlyqqa qasaqana ziian keltirý" baby boiynsha kináli dep taýyp, 2 jyl jáne 6 aiǵa bas bostandyǵynan aiyrdy. Sot sonymen birge "Buzaqylyq" baby boiynsha aiyptalǵan Sortóbe turǵyny Ersman Iýnhýdyń (birinshi aiyptalýshynyń ákesi) bostandyǵyn 2 jyl 6 aiǵa shektedi.
Sot úkimi 24 sáýirde shyqqanmen aqparat quraldaryna endi ǵana belgili bolyp otyr.
Bul iste Qordai aýdany Qarakemer aýylynyń 78 jastaǵy turǵyny Tólegen Qudashbaev eki balasymen birge jábirlenýshi retinde tanylǵan. Sot úkimi boiynsha, aiyptalýshylar moraldyq shyǵyn retinde jábirlenýshilerge 3 mln teńge tóleýi tiis jáne sot shyǵynyn tolyǵymen moinyna alady.
Aqparat boiynsha, kikiljiń 5 aqpanda Sortóbe aýylynda bolǵan. Tergeý organdaryna silteme jasaǵan zakon.kz saitynyń jazýynsha, Marat Iýnhý jolǵa shyǵyp, aýladan aǵasy mingen júk kóligi shyǵa alýy úshin kólikterdi toqtatqan. Dál osy kezde Tólegen Qudashbaevty balalary kólikpen dárigerge apara jatqan. Eki jaq arasynda tóbeles bolyp, qariianyń jambasy synǵan, onyń ulynyń bas súiegi men miyna zaqym kelgen.
Buǵan deiin ishki ister ministrligi Qordaidaǵy janjalǵa osy kikiljiń sebep boldy dep aitqan.
7 aqpan keshke Jambyl oblysy Qordai aýdanynda qazaqtar men dúngender janjaldasyp, resmi derek boiynsha, 11 adam qaza taýyp, 180-nen asa adam zardap shekken. Qordaidaǵy janjal kezinde Qyrǵyzstanmen shekaraǵa jaqyn ornalasqan, negizinen etnikalyq dúngender turatyn Masanchi, Sortóbe, Aýqatty aýyldary kóp zardap shekken.
Qazaqstan úkimeti janjalǵa bailanysty 120-dan astam qylmystyq is qozǵalǵanyn málimdedi. ("Adam óltirý" baby boiynsha 11 is). Qordaidaǵy janjaldan soń Jambyl oblysynyń ákimi Asqar Myrzahmetov bastaǵan birneshe sheneýnik jáne politsiia departamentiniń basshysy qyzmetten ketti. Onyń ornyna sol kezde premer-ministrdiń orynbasary bolǵan Berdibek Saparbaev taǵaiyndaldy.
29 sáýirde Almatydaǵy tergeý izoliatorynda Jambyl oblysy Qordai aýdanynda bolǵan ultaralyq janjalǵa bailanysty ustalǵan Bekbol Kibaevtyń qaitys bolǵany belgili boldy. Prokýratýra osy oqiǵa boiynsha sotqa deiingi tergeý bastalǵanyn habarlady. Oqiǵanyń basqa jaittary belgisiz.
