Bul týraly Jambyl oblysy boiynsha Sottar ákimshisiniń basshysy Berik Qultasov Óńirlik kommýnikatsiialar qyzmetinde ótken brifingte aitty, dep habarlaidy "Ult aqparat".
Jambyl oblysynyń qylmystyq ister jónindegi mamandandyrylǵan aýdanaralyq soty 2021 jyldyń 27 sáýirinde Qordai aýdanyndaǵy jappai tártipsizdik boiynsha úkim shyǵardy. 2020 jyldyń 7-8 aqpan aralyǵynda Jambyl oblysy Qordai aýdany Masanshy, Buǵar-baty jáne Aýqatty aýdandarynda jappai tártipsizdik boldy. Onda olar zorlyq-zombylyq kórsetip, órtep, múlikti qiratyp, atys qarýyn qoldandy. Saldarynan 10 azamat qaza taýyp, taǵy bir adam janyp jatqan ǵimaratqa qulap, qaitys boldy, - dedi ol.
Qultasov aitqandai, 158 azamat pen 20 politsiia qyzmetkeri jaraqat aldy.
156 turǵyn úi men saýda nysandary, 102 avtokólik quraly búlinip, menshik ielerine keltirilgen zalal 829 mln 848 myń teńge boldy. Jambyl oblysy Politsiia departamentiniń 10 avtokóligi zaqymdaldy. Memleketke 3 mln 291 myń teńge zalal keltirildi, - dedi ol.
Onyń aitýynsha, jappai tártipsizdiktiń týyndaýyna atalǵan aýyldar turǵyndarynyń arasyndaǵy turmystyq jaǵdai boldy.
Buǵan deiin sot úkimi boiynsha buzaqylyq árekettermen densaýlyqqa ziian keltirip, bilik ókilderine kúsh qoldanǵany úshin 6 adam sottalǵan bolatyn. Búgingi qylmystyq is boiynsha 2020 jyldyń 8 jeltoqsanynan biylǵy 19 sáýirge deiin ótti. Oǵan eki prokýror, 366 jábirlenýshi jáne 16 jábirlenýshi ókili, 10 qorǵaýshy jáne 4 aýdarmashy qatysty, - dedi ol.
Qultasov ataǵandai, is boiynsha 51 adam aiyptalýshy retinde sotqa berilip, onyń ishinde 33-i qamaýda, 18 adam jeke kepildik jáne eshqaida ketpeý qolhaty boiynsha ustaldy.
Sottalýshylarǵa túrli sonyń ishinde aýyr jáne asa aýyr qylmystar jasady degen aiyp taǵyldy. Sot zań men sot aldyndaǵy teńdik printsipin basshylyqqa alyp, jinalǵan dáleldeme men qylmystyq zańnamada kórsetilgen jaza aiasynda kelesi sheshimderdi shyǵardy: 50 adamdy kináli dep tanyp, bir adamnyń kánisiniń dáleldenbeýine bailanysty ony aqtady. Sottalýshylardyń kinálary molekýliarlyq, sot-tergeý qorytyndylary men jasyryn beinebaqylaý dáleldemelerimen tolyq dáleldengen, - dedi ol.
