Jambyl oblysynyń Qordai aýdanynda ornalasqan Qaraqońyz sý qoimasy jasyl túske boialdy, dep habarlaidy "Ult aqparat".
Tamyz aiynyń basynda sý aidynynyń túsi aiaq astynan jap-jasyl bolyp ketken. Masanshy aýylynyń turǵyndary sýdyń erekshe túsine tańǵalyp, onyń sýreti men videosyn áleýmettik jelide jariialady.
Aýyl halqynyń aitýynsha, olar mundai jaǵdaidy birinshi ret kórip otyr. Olar qaýipsizdik úshin balalaryn aidynnyń mańyna jolatpai, sýǵa shomylýyna tyiym salǵan.
«Qazsýshar» RMK mamandary aýyl turǵyndarymen birge Qaraqońyz sýynan synama alyp, Qordaidaǵy sanitarlyq-epidemiologiialyq stansanyń zerthanasyna joldaǵan. Alaida bul zerthanada tek ishetin sýǵa zertteý júrgiziledi eken, al myna aǵyn sýdy oblys ortalyǵynda ǵana saraptamadan ótkizýge múmkindik bar.
4 tamyzda Qaraqońyz sý qoimasyna Jambyl oblysynyń ekologiia departamentinen úsh maman kelip, jaǵalaý boiyn tekserdi, birneshe núkteden synama aldy.
«Taiaýda sol zertteýdiń qorytyndysy shyqty, - deidi Qordai aýdany ákiminiń orynbasary Myrzaǵali Kúzerbaev. - Qorqatyndai eshteńe joq, barlyq kórsetkishter óz qalpynda. Tek kei komponentter boiynsha kontsentratsiianyń tiisti mólsheri joǵarylaǵany belgili boldy. Biraq sýdyń jasyl túske boialýyna ol emes, tabiǵi qubylys sebep bolǵan. Iaǵni, sýdaǵy baldyrlar fotosintez protsesinde sýdyń túsin ózgertip jibergen».
Myrzaǵali Kúzerbaevtyń aitýynsha, ekologiia departamentiniń mamandary sý qoimasyn birneshe kún boiy baqylaǵan. Búginde sýdyń beti qaitadan óziniń úirenshikti túsine boialǵan.
«Alańdaýdyń qajeti joq. Kóldiń florasy men faýnasy zardap shekken joq» deidi ol.
Aita keteiik, Qaraqońyz - Jambyl oblysyndaǵy eń iri sý aidyndarynyń biri. Onyń sýy egin alqaptaryn sýarýǵa paidalanylady.
