19 sáýirde Qyrǵyz Respýblikasynyń prezidenti Sadyr Japarovtyń Qazaqstanǵa resmi sapary aiasynda Qazaqstannyń mádeniet qairatkerlerine memlekettik nagradalar tabystaý rásimi ótken. Bul týraly Mádeniet jáne aqparat ministrligi habarlady.
Saltanatty is-shara barysynda Qyrǵyzstannyń memlekettik hatshysy Súiinbek Qasmambetov mádeniet jáne óner ókilderin memlekettik nagradalarmen marapattaý ǵasyrlarǵa ulasqan dostyqtyń, ortaq mádeniettiń, damyp kele jatqan yntymaqtastyqtyń belgisi ekenin atap ótti. Sonymen qatar onyń mádeni-gýmanitarlyq bailanystardyń qarqyndy damýyna baǵyttalǵan qadam retinde qarastyrylýy kerek ekenin sóz etti.
Qyrǵyz Respýblikasy men Qazaqstan arasyndaǵy dostyq pen yntymaqtastyqty nyǵaitýǵa qosqan eleýli úlesi úshin Qyrǵyzstan prezidentiniń jarlyǵymen Qazaqstan Respýblikasynyń qoǵam qairatkeri, mádeniettanýshy Murat Áýezov, kórnekti aqyn, diplomat, Qazaqstan Respýblikasynyń Qyrǵyz Respýblikasyndaǵy burynǵy elshisi Muhtar Shahanov «Danaker» ordenimen marapattaldy. Al «Dostýk» ordeni pýblitsist, ádebiettanýshy, jýrnalist, kinosynshy, Májilistiń burynǵy depýtaty Saýytbek Ábdirahmanovqa, Qazaqstan Respýblikasynyń memleket jáne qoǵam qairatkeri, túrkitanýshy ǵalym Myrzatai Joldasbekovke jáne Ál-Farabi atyndaǵy Qazaq ulttyq ýniversitetiniń basqarma tóraǵasy, rektor Janseiit Túimebaevqa tabystaldy.
«Dańk» ordenin Halyqaralyq túrki mádenieti men murasy qorynyń prezidenti Aqtoty Raiymqulova ielendi.
Sondai-aq «Qyrǵyz Respýblikasynyń Halyq ártisi» qurmetti ataǵy qazaqstandyq belgili kompozitor Altynbek Qorazbaevqa, tanymal estrada ánshisi Roza Rymbaevaǵa berildi.
"1996 jyly maǵan Qyrǵyzstannyń eńbek sińirgen mádeniet qairatkeri ataǵy berildi. 28 jyldan keiin «Qyrǵyz Respýblikasynyń Halyq ártisi» qurmetti ataǵyn alyp otyrmyn. Bul – men úshin úlken jetistik", - dedi Roza Rymbaeva.
Al «Tań-Sholpan» kórkem-ádebi jýrnaly redaktorlar keńesiniń tóraǵasy, bas direktory Didar Qulkenov «Dańk» medalimen marapattaldy.
