«Qazaqstan halqyna» qorynyń basqarma tóraǵasy Bolat Jámishev qorǵa túsken qarajat esebinen eldiń áleýmettik problemasyn tolyqtai sheshý múmkin emestigin jetkizdi. Sondai-aq, qor basshysy túsip jatqan qarjynyń aldymen qaida jumsalatynyn aitty, dep habarlaidy QazAqparat.
«Barshanyń nazaryna taǵy bir qaitalap aitqym keledi. Qor esebinen búkil áleýmettik máseleni sheshý múmkin emes. Iaǵni, eldegi kedeilik, jumyssyzdyq qor jumysy arqyly sheshilmeidi. Árine, qaiyrymdylyq esebinen belgili bir kólemde muqtaj jandardyń problemasyn sheshýge bolady. Biz qoldan kelgenshe barshany qamtýǵa tyrysamyz, degenmen kómek aldymen asa muqtaj jandarǵa baǵyttalady», - dedi Bolat Jámishev OKQ-de onlain ótken baspasóz máslihatynda.
Onyń aitýynsha, qorǵa qarjy aýdarǵan ár adamnyń onyń qaida jumsalyp jatqany týraly bilýge tolyq quqyǵy bar.
«Qordyń jumysy ashyq júrgiziledi. Qor qyzmetine qatysty barlyq aqparattar bizdiń saitta jariialanady. Iaǵni, qansha qarjy túsip jatyr, ol qaida jumsalyp jatyr barlyǵy ashyq kórsetiledi. Ashyqtyq - biz kózdep otyrǵan basym baǵyttyń biri», - deidi ol.
