Segizinshi qabattan qulai jazdaǵan úsh jasar qyzdy qutqaryp qalǵan Sábit pen Saǵidyń erligin videoǵa túsirgen Baqyt Chetenovaǵa almatylyq kásipker men aitysker aqyn Sara Toqtamysova syi jasady, - dep habarlaidy Tengrinews.kz agenttigi.
Bul týraly Qazaqstan arnasyndaǵy "1001 tún" baǵdarlamasynda aityldy.
Sábit pen Saǵidyń qýanyshyna sebepker bolǵan Baqyt Chetenova birer kún buryn ul bosandy. Tórtinshi balany dúniege ákelgen ol áli perzenthanada jatyr, dese de baǵdarlamaǵa telefon arqyly bailanysqa shyqty. Sol jerde aldymen aqyn Sara Toqtamysova kelinshektiń "eńbegi zor ekenin aityp", oǵan bosanǵan soń jyly júrsin dep kájekei syilady.
"Sizdiń bul isińiz kópke úlgi bolatyn jaǵdai. Sebebi, shyny kerek, qanshama jaǵdai bolyp jatyr. Onyń barlyǵy aitylǵan jerde qalyp jatyr. Al bul jerde marapat alyp, sol video arqyly shetelge taralyp jatyr. Sondyqtan sizdiń eńbegińiz eren", - degen aqyn Baqyt Chetenovaǵa kájekei syilady.
Al baǵdarlama sońynda júrgizýshiler Baqyt Chetenovaǵa almatylyq kásipker qarjylai syi beretinin aitty.
Buǵan deiin terezeden qulai jazdaǵan úsh jasar qyzdy qutqarý sátin videoǵa túsirgen elordalyq Baqyt Chetenova eshkim alǵys aitpaǵanyn málimdegen edi.
Eske salaiyq, astanada kópqabatty turǵyn úidiń segizinshi qabatynan qulai jazdaǵan qyzdy qutqarǵan qyzylordalyq Sábit Shontaqbaev pen Saǵi Jylqyshievke Nur-Sultannan páter beriletin boldy. Sonymen qatar, eki er adamǵa jumysqa ornalasýyna jáne nesiesin jabýǵa kómek beriledi. Oqiǵa 11 mamyrda bolǵan.
