«Eńbek» Memlekettik baǵdarlamasy aiasynda kópbalaly otbasylardyń jobalaryn mikrokreditteý merzimi 7 jylǵa deiin bolady.
Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy ministrliktiń baspasóz qyzmeti.
Qazaqstan Respýblikasy Premer-Ministriniń orynbasary Berdibek Saparbaevtyń Mańǵystaý oblysyna jumys sapary aiasynda Qazaqstan Respýblikasy Eńbek jáne halyqty áleýmettik qorǵaý ministri Birjan Nurymbetov Jańaózen qalasynyń Halyqty jumyspen qamtý ortalyǵynda bolyp, onda QR Prezidenti Qasym-Jomart Toqaevtyń Qazaqstan halqyna Joldaýynda aitylǵan tapsyrmalardyń oryndalýy týraly aitty jáne jumyssyzdardy jumyspen qamtýǵa járdemdesýdiń belsendi sharalaryna tartýdyń mańyzdylyǵyn atap ótti.
Eńbekmininiń basshysy óńirdegi baǵdarlamasyn Jańaózendegi halyqty jumyspen qamtý ortalyǵyna barýdan bastady. Onda nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasynyń qatysýshylarymen kezdesti.
Memleket tarapynan qarjylyq kómek alyp, óz isin belsendi damyta bastaǵan jańaózendiktermen áńgimelesken Birjan Nurymbetov olardyń «Eńbek» memlekettik baǵdarlamasynyń múmkindikterin paidalanýdyń jarqyn úlgisi ekenin atap ótti.
«Jańa biznestiń turaqtylyǵyn qamtamasyz etý úshin kópbalaly otbasylardyń jobalaryna mikrokredit berý merzimi 7 jylǵa deiin sozylady. Qaryzdardy tóleý kezinde qarjylyq júktemeni azaitý úshin mundai jobalar boiynsha nominaldy syiaqy mólsheri jyldyq 4%-dan aspaidy. Jetkilikti kepildi múligi joq tabysy az kópbalaly otbasylar úshin mikrokreditterge kepildik berý tetikteri taratylatyn bolady», – dedi Birjan Nurymbetov.
Halyqty jumyspen qamtý ortalyǵy qyzmetkerlerimen bolǵan áńgime sońynda ministr olardy «Eńbek» memlekettik baǵdarlamasynda kózdelgen jumyspen qamtýǵa járdemdesý sharalaryna jumyssyzdardy belsendi tartýǵa shaqyrdy.
Sondai-aq, jumys sapary barysynda Birjan Nurymbetov Jańaózendegi «Janarys» tigin fabrikasyna bardy.
