Kópbalaly analardy májbúrlep jumysqa shyǵarý oiymyzda joq. Bul týraly búgin Úkimettiń selektorlyq rejimdegi otyrysynan keiin BAQ ókilderiniń saýalyna jaýap bergen Eńbek jáne halyqty áleýmettik qorǵaý ministri Tamara Dúisenova málim etti, dep habarlaidy Ult.kz tilshisi QazAqparat agenttigine silteme jasap.
«Ózderińizge belgili, 2014 jyldan beri «Órleý» baǵdarlamasyn júzege asyryp jatyrmyz. Bizde 3 jasqa, 7 jasqa deiingi balalaryn qarap otyrǵan analar bar. Eger sol azamatshalardyń múmkinshiligi bolsa, onda biz olardy oqytyp, mamandyqqa baýlyp, jańa jumysqa ornalastyrýdy kózdep otyrmyz. Balalaryn qarap otyrǵan analardyń bul baǵdarlamaǵa qatysý-qatyspaýy erikti, mindetteý joq. Azamatsha óziniń mamandyǵyn ózgertip, áleýmettik qyzmetker bolamyn dep oqyp, bizdiń baǵdarlamaǵa qatysamyn dese, jumys berýge daiar ekendigimizdi jetkizgim keledi», - dedi Tamara Dúisenova.
Esterińizge sala ketsek, osydan bir-eki kún buryn birqatar otandyq buqaralyq aqparat quraldary elimizde kópbalaly analardy májbúrlep jumysqa shyǵarý qolǵa alynbaq dep baibalam salǵan bolatyn. Olardyń jazýynsha, 2018 jyldyń 1 qańtarynan bastap áleýmettik járdemaqyny shartsyz jáne shartty dep ekige bólip qarastyrady. Shartsyz járdemaqyny otbasynda tabys tabatyn adamy joq otbasy alady. Al, shartty járdemaqyny otbasynda tabys tabatyn bir adam bolsa, onymen kelisim jasalyp, eńbek etýge mindetteidi. Olai bolmaǵan jaǵdaida, aqsha berilmeidi.
