Qazaqstan isker áielder qaýymdastyǵynyń prezidenti Raýshan Sársembaeva kópbalaly jáne az qamtylǵan analardy qoldaityn memlekettik baǵdarlamalar týraly pikirimen bólisti, dep habarlaidy QazAqparat.
Raýshan Sársembaevanyń aitýynsha, qaýymdastyqta kópbalaly analarǵa arnalǵan «Járdem» respýblikalyq baǵdarlamasy iske qosylǵan. Alaida bul baǵdarlamaǵa qatysýǵa analar belsendilik tanytpai otyr.
«Biz eńbek naryǵynda suranysqa ie mamandyqtar boiynsha tegin oqytamyz: aspaz, naýbaishy, sulýlyq mamany, tiginshi. Almatyda «Baqytty otbasy» ortalyǵy arqyly 120 oryn usyndyq, onda biz áielderdi oqytyp, sol jerde jumysqa ornalastyrdyq. Ókinishke qarai, bizde oqyǵysy keletin adamdardyń tizimi joq. Kópbalaly analardyń ózderi ártúrli syltaý aitady. Biriniń balalaryn tastaityn jeri bolmasa, endi biri ýaqytynyń joqtyǵyn alǵa tartady. Biz Nur-Sultanda eki aspaz jáne eki tiginshini daiyndap oqyttyq. Biz olarǵa óz isimen ainalysý úshin básekege qabiletti oryndarda úirenip, keiin sol jerde jumys isteýge jaǵdai jasadyq. Tiginshi mamandyǵy boiynsha oqyǵysy keletin 16 adam tirkeldi. Onyń 8 rastaldy, oqýǵa 2 adam keldi. Biznesti úiretýge daiynbyz, biz olardy tegin oqytyp, turaqty jumysqa ornalastyrýǵa ázirmiz. Bizge tek Almatydan ǵana qaýymdastyq múshelerinen 120 oryn qajet, biraq olar qyzyǵýshylyq tanytyp otyrǵan joq», - dedi spiker.
Sonymen birge ol qazaqstandyq otbasylarǵa tólenetin ataýly áleýmettik kómek (AÁK) týraly aitty. Raýshan Sársembaeva atap ótkendei, «AÁK qarapaiym otbasy músheleriniń tabysyna bailanysty bolǵandyqtan, bul táýeldi kóńil-kúi týǵyzady, áielge jumys istemei-aq memleketten beriletin járdemaqyny alyp otyrǵan yńǵaily».
«Kópbalaly analar AÁK alýǵa daiyn, biraq bul otbasynyń tabysyna bailanysty. Áielder jumys istegen jerinen ketedi, óitkeni eger áiel bir jerde jumys istep, tórt balaǵa 90 myń alsa, AÁK odan kóbirek. Sondyqtan olar úide otyrǵandy jón kóredi. Olar kúieýiniń tabysyn jasyrý úshin ajyrasýǵa deiin barady. AÁK-niń tabysqa bailanýy biz kórip otyrǵan jaǵymsyz jaittarǵa alyp keldi. Áiel jumys istegisi keletin shyǵar, biraq oǵan AÁK alý tiimdi. Birinshiden, memlekettik qurylymdarǵa AÁK-ti otbasy tabysymen bailanystyrýdy alyp tastaý qajet. Biz adamdardy oqytyp, jumysqa turǵyza almai otyrmyz. Olar ataýly áleýmettik kómekten qaǵylamyz dep qorqady », - deidi Raýshan Sársembaeva.
Eske salaiyq, QR Premer-Ministriniń orynbasary Berdibek Saparbaev kópbalaly analarmen kezdesý barysynda AÁK-ti shynymen muqtaj otbasylar alýy kerek ekenin basa aitty.
Almatyda 1300-den astam kópbalaly otbasyǵa tólem toqtatyldy, aiyna 83 million teńge durys tólenbegeni anyqtaldy.
