Nur-Sultan qalasynyń ákimdigi qoǵamdyq kólikke qandai talaptar qoiylyp otyrǵanyn jariia etti, dep habarlaidy QazAqparat tilshisi.
«Qoǵamdyq kólikter 12 mamyrda jumysyn bastady. Olarǵa kóp talap qoiylady. Tańǵy 07.00-den keshki 19.00-ge deiin júredi. Avtobýstarda sanitarlyq talaptardyń saqtalýyn qadaǵalap otyratyn jaýapty qyzmetker taǵaiyndalady. Ol qyzmetker jeke bas gigienasyn, qoǵamdyq gigiena quraldarynyń bolýyn, dezinfektsiia quraldarynyń jetkilikti bolýyn, júrgizýshiler men basqa da mamandardyń tiisti talaptardy saqtaýyn qadaǵalaidy. Barlyq qyzmetkerge kúndelikti nusqaýlyq berilip, ol nusqaýlyq jazbasha túrde jýrnalǵa belgilenip otyrýy kerek. Sonymen qatar jolaýshy tasymaldaityn júrgizýshilerde jumysqa kelgen kezde koronavirýsqa bailanysty PTR-testen ótkeni týraly anyqtama bolýy tiis. Olar ary qarai eki aptada bir ret sol testiden ótip otyrýy kerek», - dedi qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń tehnikalyq reglamentterdi baqylaý bólimniń basshysy Qarlyǵash Ábdisheva qala ákimdiginiń Facebook paraqshasynda ótken onlain rejimdegi baspasóz máslihatynda.
Onyń aitýynsha, avtobýs júrgizýshileri mindetti túrde maska men rezeńke qolǵap kiiýi kerek. Qolǵapty kúnine eki ret, maskany eki saǵat saiyn aýystyryp otyrýy tiis.
«Olardyń sonymen birge antiseptigi bolýy tiis. Jolaýshylardy tek otyratyn oryndarmen tasymaldaý kerek. Túregep turǵan jolaýshy bolmaýy tiis. Kóp jolaýshy kirgizbeýi kerek. Sondai-aq, toqtaǵan kezde avtobýstyń barlyq esigi ashylyp turýy tiis. Jumystyń basynda jáne sońynda avtobýs salondary jýylyp, dezinfektsiia jasalady. Kúndelikti reisterde sońǵy aialdamaǵa kelgen kezde avtobýstardyń búkil esik-terezesi ashylyp, jeldetilip, adam qoly janasatyn oryndarǵa dezinfektsiia júrgiziledi», - dedi ol.
Eske sala ketsek keshe Nur-Sultan qalasy ákiminiń orynbasary Baqtiiar Máken 12 mamyrdan bastap qoǵamdyq kólik qashan jumysyn bastaitynyn habarlaǵan edi.
