نۇر-سۇلتان قالاسىنىڭ ەكٸمدٸگٸ قوعامدىق كٶلٸككە قانداي تالاپتار قويىلىپ وتىرعانىن جارييا ەتتٸ, دەپ حابارلايدى قازاقپارات تٸلشٸسٸ.
«قوعامدىق كٶلٸكتەر 12 مامىردا جۇمىسىن باستادى. ولارعا كٶپ تالاپ قويىلادى. تاڭعى 07.00-دەن كەشكٸ 19.00-گە دەيٸن جٷرەدٸ. اۆتوبۋستاردا سانيتارلىق تالاپتاردىڭ ساقتالۋىن قاداعالاپ وتىراتىن جاۋاپتى قىزمەتكەر تاعايىندالادى. ول قىزمەتكەر جەكە باس گيگيەناسىن, قوعامدىق گيگيەنا قۇرالدارىنىڭ بولۋىن, دەزينفەكتسييا قۇرالدارىنىڭ جەتكٸلٸكتٸ بولۋىن, جٷرگٸزۋشٸلەر مەن باسقا دا مامانداردىڭ تيٸستٸ تالاپتاردى ساقتاۋىن قاداعالايدى. بارلىق قىزمەتكەرگە كٷندەلٸكتٸ نۇسقاۋلىق بەرٸلٸپ, ول نۇسقاۋلىق جازباشا تٷردە جۋرنالعا بەلگٸلەنٸپ وتىرۋى كەرەك. سونىمەن قاتار جولاۋشى تاسىمالدايتىن جٷرگٸزۋشٸلەردە جۇمىسقا كەلگەن كەزدە كوروناۆيرۋسقا بايلانىستى پتر-تەستەن ٶتكەنٸ تۋرالى انىقتاما بولۋى تيٸس. ولار ارى قاراي ەكٸ اپتادا بٸر رەت سول تەستٸدەن ٶتٸپ وتىرۋى كەرەك», - دەدٸ قالالىق تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ دەپارتامەنتٸنٸڭ تەحنيكالىق رەگلامەنتتەردٸ باقىلاۋ بٶلٸمنٸڭ باسشىسى قارلىعاش ەبدٸشەۆا قالا ەكٸمدٸگٸنٸڭ Facebook پاراقشاسىندا ٶتكەن ونلاين رەجيمدەگٸ باسپاسٶز مەسليحاتىندا.
ونىڭ ايتۋىنشا, اۆتوبۋس جٷرگٸزۋشٸلەرٸ مٸندەتتٸ تٷردە ماسكا مەن رەزەڭكە قولعاپ كييۋٸ كەرەك. قولعاپتى كٷنٸنە ەكٸ رەت, ماسكانى ەكٸ ساعات سايىن اۋىستىرىپ وتىرۋى تيٸس.
«ولاردىڭ سونىمەن بٸرگە انتيسەپتيگٸ بولۋى تيٸس. جولاۋشىلاردى تەك وتىراتىن ورىندارمەن تاسىمالداۋ كەرەك. تٷرەگەپ تۇرعان جولاۋشى بولماۋى تيٸس. كٶپ جولاۋشى كٸرگٸزبەۋٸ كەرەك. سونداي-اق, توقتاعان كەزدە اۆتوبۋستىڭ بارلىق ەسٸگٸ اشىلىپ تۇرۋى تيٸس. جۇمىستىڭ باسىندا جەنە سوڭىندا اۆتوبۋس سالوندارى جۋىلىپ, دەزينفەكتسييا جاسالادى. كٷندەلٸكتٸ رەيستەردە سوڭعى ايالداماعا كەلگەن كەزدە اۆتوبۋستاردىڭ بٷكٸل ەسٸك-تەرەزەسٸ اشىلىپ, جەلدەتٸلٸپ, ادام قولى جاناساتىن ورىندارعا دەزينفەكتسييا جٷرگٸزٸلەدٸ», - دەدٸ ول.
ەسكە سالا كەتسەك كەشە نۇر-سۇلتان قالاسى ەكٸمٸنٸڭ ورىنباسارى باقتييار مەكەن 12 مامىردان باستاپ قوعامدىق كٶلٸك قاشان جۇمىسىن باستايتىنىن حابارلاعان ەدٸ.
