El damýynyń dińgegine ainalǵan Ult jospary – ult pen ulystardy uiystyratyn, ótkir de utqyr ideiaǵa qurylǵan keshendi is. Elbasy usynǵan 5 institýtsionaldyq reforma el arasynda birden qoldaý taýyp, jalpyhalyqtyq reformaǵa ainaldy. Bul – Ult josparynyń kókjiegi keń, mańyzy men nátijesi orasan zor ekeniniń, qazaq eliniń damyp kele jatqanynyń aiǵaǵy.
Elbasynyń reformalyq baǵdary men ony oryndaý jolyndaǵy tiianaqty 100 qadamy – elimizdiń ósip-órkendeýiniń uly jospary. Álemniń aldyńǵy qatarly eline ainalý jolynda elimiz shirek ǵasyrdan astam kezeńde talai belesterdi baǵyndyrdy, tamyry tereńde jatqan tól tarihymyzdyń jańa betteri ashyldy. Osy qysqa ǵana ýaqyt ishinde ekonomikalyq jáne áleýmettik mańyzy zor jobalardy qolǵa alyp, álemdik deńgeidegi is-sharalardyń ótýine uiytqysy bola bildi. Solardyń biri jaqyn kúnderi bastalatyn «EXPO-2017» kórmesin ótkizý Qazaqstannyń halyqaralyq deńgeide alǵa jyljýyna jasalǵan úlken qadam dep bilemiz. EXPO sekildi halyqaralyq kórmelerge qatysý – qai eldiń bolsa da áleýetin dúniejúzine pash etýge berilgen tamasha múmkindik. Onyń ústine, álem aldynda óziniń damý deńgeiin is júzinde dáleldei otyryp, sharany joǵary jaýapkershilikpen ótkizý – ári qurmet, ári úlken jaýapkershilik. Bul – eldiń de, sol elde turatyn qoǵam músheleriniń de betbeinesin tanytatyn tarihi shara.
«Ult josparynda» memleket tarapynan halyqtyń rýhani-mádeni damýyna da basa nazar aýdarylǵan. Táýelsizdik alǵan jyldardan beri kóptegen iri reformalar, onyń ishinde áleýmettik-ekonomikalyq, saiasi-mádeni, rýhani salalardaǵy mańyzdy sharýalar júzege asyryldy. Álemdik sarapshylar Qazaqstannyń az ýaqyttaǵy jetistikterin eldegi turaqtylyqpen, etnosaralyq, konfessiiaaralyq dostyqpen jáne toleranttylyqpen bailanystyrady, óitkeni turaqtylyqty damýynyń tuǵyry etpegen eldiń bolashaǵy da bulyńǵyr bolatyny sózsiz.
Táýelsizdik jyldary ishinde elimizde qandai din men etnomádenietke jatatynyna qaramastan, barlyq qazaqstandyqtardyń jalpy ulttyq birligi men kelisiminiń erekshe úlgisi qalyptasty. Álemdik jáne dástúrli dinder liderleriniń V Seziniń ashylýynda Ult kóshbasshysy Nursultan Nazarbaev shirek ǵasyrǵa jýyq táýelsizdigimizde Qazaqstannyń rýhani qaita órleý dáýirin bastan ótkergendigine dinbasylar men saiasi qairatkerlerdiń nazaryn aýdaryp: «Elimizde jumys isteitin barlyq dinderdiń pastvalary – bir úlken qazaqstandyq otbasynyń músheleri. Bizdiń bárimiz birlesip, dúrdarazdyq pen urys-keriske jol bermeitin jańa el qurýdamyz», – degen bolatyn. Búgingi tańda elimizde 2017 jyly 5 sáýirdegi esep boiynsha elimizde 18 konfessiiany quraityn 3663 dini birlestikter tirkelgen, onyń ishinde basym kópshiligi Qazaqstan musylmandary dini basqarmasyna (QMDB) qarasty (2570) meshitter bolsa, al ekinshi orynda – Qazaqstannyń Pravoslavielik shirkeýiniń (332) dini ǵibadat oryndary. Sonymen qatar elimizde 335 missioner qyzmet etedi.
Endigi mindet – barlyq konfessiialardyń arasynda qalyptasqan jarasymdy dostyq pen ózara túsinistikke, kelisim men birlikke, toleranttylyqqa syzat túsirip almaý.
Elimizdi jańartýǵa baǵyttalǵan Ult jospary – «100 naqty qadamda» etnikalyq jáne dini aiyrmashylyqtaryna qaramastan, barlyq qazaqstandyqtardyń jarqyn ómir súrýi oilastyrylǵan. Sonymen qatar «Qazaqstan-2050» strategiiasy men «Máńgilik El» jalpyulttyq ideiasynda qalanǵan sheshýshi basymdyqtardy júzege asyrýdyń naqty jol nusqaýshy kartasy ispetti. Onyń ústine Elbasy N.Nazarbaevtyń jaqynda jariialanǵan «Bolashaqqa baǵdar: rýhani jańǵyrý» atty maqalasy reformany júzege asyrýǵa tyń kúsh-jiger bergeni de aqiqat. Maqalanyń árbir tarmaǵy, onda sóz bolǵan keleli máseleler kóptiń kókeiinde júrgen kúdikti seiiltti.
Endi baǵytymyz – aiqyn, maqsatymyz – anyq, tek kezeń-kezeńimen júzege asyrý men naqty maqsattarǵa qol jetkizý mindeti tur. Elbasy bastaǵan, eli qoshtaǵan aýqymdy reformalardy júzege asyrý úshin ár azamat intellektýaldy jigerli bolyp, tikelei atsalysýy kerek. Sonda ǵana biz el birligin odan ári nyǵaityp, táýelsizdigimizdi máńgilik etemiz.
Turar Ábýov,
QR DIAQM DIK Din máseleleri jónindegi ǵylymi-zertteý jáne taldaý ortalyǵynyń bólim basshysy, bas ǵylymi qyzmetker
