Densaýlyq saqtaý ministri Eljan Birtanov Qazaqstanda koronavirýs taralý jaǵdaiynyń qashan báseńdeitini týraly boljamyn bólisti, dep habarlaidy "Ult aqparat".
«Kez kelgen infektsiianyń sharyqtaý shegi baryn aityp kelemiz. Densaýlyq saqtaý ministrliginiń, Úkimettiń durys áreketine qarai ol báseńdeidi. Jalpy kóp elde aýrýdyń taralyp, báseńdeý ýaqyty úsh aidy alyp otyr. Alaida álemdegi bir de bir el áli de nóldik deńgeige jetken joq. QHR-da jańadan juqtyrǵandardyń múlde tirkelmegen oqiǵasy bolǵan. Alaida infektsiia qazir álemnen eshqaida ushyp ketken joq. Ainalyp júr. Ázirge joǵalar túri baiqalmaidy», - dedi Eljan Birtanov Tengriniýs Instagram paraqshasynyń tikelei efirinde.
Osy sebepti ministr koronavirýs báseńdegen kúnniń ózinde belgili bir ýaqyt ishinde aýrýdy juqtyrý jaǵdaiy bolatynyn aitady.
«Sondyqtan aýrýdyń ósimin, sharyqtaý shegi men báseńdeý ýaqytyn úsh ai boiy baqylaýda ustaimyz. Alaida mamyrdan keiin bári ornyna kele qalady dep taǵy aita almaimyz. Álbette infektsiianyń belgili bir mólsherde tirkeletini týraly boljam bar. Bizdiń mindet – osy jaǵdaida ómir súrýge úirený. Sebebi infektsiia juqpaly. Halyqtyń jekelegen sanaty úshin ol aiqyn qaýip týǵyzýy múmkin», - dedi ol.
