Mamyrdyń 3-i kúni túske qarai Almaty qalalyq ákimdigine onǵa jýyq kóp balaly ana jinalyp, “Baqytty otbasy” baǵdarlamasynyń talaptaryna narazy ekenin jetkizdi. Olardyń aitýynsha, bul baǵdarlama boiynsha baspana alýdyń negizgi talaptarynyń biri – bir ai ishinde bastapqy naryqtan eń arzan úi taýyp, usyný. Buǵan deiin qalanyń barlyq aýdandaryn sharlaǵanyn aitqan analar "qysqa merzim ishinde arzan úi taba almadyq" deidi.
"Barlyq jerge bardyq. Kóp izdedik. Shynyn aitsaq, makler bolyp qaldyq. "Aqkentke" barsaq, eki bólmeli páterler 17 million teńgeden bastalady. Bizdiń birden eki million teńgesin (bastapqy jarna - red.) tóleýge shamamyz jetpeidi. "Merkýr Gradtaǵy" úiler 10 mamyrda paidalanýǵa beriledi deidi. Ol jerde barlyǵy 38 sharshy metrlik bir bólmeli páterler. "Aqniette" de, barlyq jerde sondai. Qalasańyz, tizimin de kórsete alam" deidi shaǵymdanǵan analardyń biri Jansaia Sopbekova.
Qujattaryn kórsetken Sopbekova úi tańdaý merziminiń 8 mamyrda aiaqtalatynyn, odan keshikse baǵdarlama boiynsha úi alý múmkindiginen airylatynyn aitady.
Buǵan qosa, analar úilerdiń qymbattyǵyna da shaǵymdandy.
"Biz bergen aqshaǵa tek bir-aq bólme keledi. Kóp balaly otbasylar bir bólmege qalai syiady?” deidi analardyń biri.
Kóp balaly analar bilikten úi tańdaý merzimin uzartýdy, ekinshi dárejeli turǵyn úi alýǵa da ruqsat berýdi surap otyr.
Ákimdikten shyqqan aty-jónin aitpaǵan qyzmetker birneshe ananyń ǵana basshylarmen kezdese alatynyn aityp, birneshe áieldi ishke kirgizdi. Qalǵan analar jáne oqiǵany qamtýǵa kelgen aqparat quraldarynyń ókilderi syrtta qaldy.
Tústen keiin Almaty ákimdiginen shyqqan ózin turǵyn úi saiasaty basqarmasy jetekshisiniń orynbasary retinde tanystyrǵan Aibek Saidildaev analarǵa "Baqytty otbasy" baǵdarlamasy boiynsha úi ala almaǵandardyń respýblikalyq baǵdarlamalarǵa qatysa alatynyn jetkizdi. Onyń aitýynsha, respýblikalyq deńgeide baspanamen qamtamasyz etý boiynsha baǵdarlama áli jariialanbaǵan. Biraq ol týraly Qazaqstannyń tuńǵysh prezidenti Nursultan Nazarbaev 23 sáýir kúngi "Nur Otan" sezinde aitqan. Úi tańdaý merzimin uzartý týraly ótinish aitqan analardyń suraǵyna jaýap bergen Saidildaev ony taǵy "eki aptaǵa sozýy múmkin" ekenin aitty.
"Kóp balaly otbasylardy arzan baspanamen qamtamasyz etýdi" kózdeitin "Baqytty otbasy" baǵdarlamasy boiynsha ótinish qabyldaý naýryz aiynyń ortasynda bastalǵan.
Almaty ákimdiginiń deregi boiynsha, qalada 1250-den astam kóp balaly otbasy baspana kezeginde tur. Buǵan deiin bilik ókilderi "bastapqy jarna baspana qunynyń 10 paiyzyn quraidy, 18 jylǵa deiin beriletin nesieniń jyldyq syiaqy mólsherlemesi 2 paiyz bolady" dep málimdegen.
Nurgúl Tapaeva, Azattyq
