Telegram-chattarda 5 maýsymda ótetin respýblikalyq referendým barysynda Nursultan Nazarbaevtyń otbasynyń barlyq múshelerine qol suǵylmaýshylyqqa kepildik beretin jáne azamattardyń salyqtary esebinen olardy ómir boiy asyraýǵa múmkindik beretin túzetýler qabyldanatyny týraly jalǵan habar tarady, dep habarlaidy Stopfake.kz saity.
Bul aqparatty Ádilet ministrligi joqqa shyǵardy.
"Tuńǵysh Prezident mártebesine qatysty Konstitýtsiiaǵa engiziletin túzetýler jobasyna sáikes úsh normany ózgertý usynyldy:
1) 42-baptyń 5-tarmaǵynyń ekinshi bóligi alyp tastalady, oǵan sáikes bir adam qatarynan eki retten artyq Respýblika Prezidenti bolyp sailana almaidy. Bul shekteý Qazaqstan Respýblikasynyń Tuńǵysh Prezidentine qoldanylmaidy.
2) 46-baptyń 4-tarmaǵy alyp tastalady. Onda Tuńǵysh Prezidenttiń mártebesi men ókilettikteri Respýblika Konstitýtsiiasymen jáne konstitýtsiialyq zańmen aiqyndalatyny jazylǵan.
Qazirgi ýaqytta Tuńǵysh Prezidenttiń quqyqtyq mártebesi «Qazaqstan Respýblikasynyń Tuńǵysh Prezidenti – Elbasy týraly» jeke Konstitýtsiialyq zańmen retteledi. Tuńǵysh Prezidentke jáne onymen birge turatyn otbasy múshelerine jeke menshik quqyǵymen tiesili múlikke qol suǵylmaýshylyq atalǵan Konstitýtsiialyq zańda belgilengen.
Óz kezeginde, atalǵan norma Konstitýtsiiadan alyp tastalǵan jaǵdaida, Qazaqstan Respýblikasynyń zańnamasyn Konstitýtsiia normalaryna sáikes keltirý úshin osy zańdy joiý qajet bolady.
3) Tuńǵysh Prezidenttiń atalýy Konstitýtsiianyń 91-babynyń 2-tarmaǵynan alyp tastalady.
Konstitýtsiianyń 91-babynyń 2-tarmaǵyna sáikes Konstitýtsiiada belgilengen memlekettiń táýelsizdigi, Respýblikanyń birtutastyǵy men aýmaqtyq tutastyǵy, ony basqarý nysany, sondai-aq táýelsiz Qazaqstannyń Negizin salýshy, Qazaqstan Respýblikasynyń Tuńǵysh Prezidenti – Elbasy irgesin qalaǵan Respýblika qyzmetiniń túbegeili printsipteri jáne Qazaqstan Respýblikasynyń Tuńǵysh Prezidenti – Elbasynyń mártebesi ózgermeidi.
Tuńǵysh Prezident mártebesine qatysty atalǵan erejelerdi alyp tastaý usynyldy.
Joǵaryda aitylǵandardy qorytyndylai kele, Konstitýtsiiaǵa engiziletin túzetýler jobasy Qazaqstan Respýblikasynyń Tuńǵysh Prezidentine jáne onyń otbasyna jańa kepildikter berýdi kózdemeitinin habarlaimyz. Kerisinshe, Konstitýtsiiaǵa ózgerister engizý týraly zań jobasynda Tuńǵysh Prezident mártebesine qatysty barlyq normalardy alyp tastaý usynyldy", – delingen ministrliktiń jaýabynda.
Demek, Nursultan Nazarbaevtyń barlyq otbasy múshelerin el azamattarynyń salyqtary esebinen ustaýǵa kepildik beretin túzetýler referendýmǵa shyǵarylatyny týraly taraǵan aqparat – feik.
