Úkimet basshysynyń orynbasary Eraly Toǵjanov áleýmettik jelide tarap jatqan aqparatqa qatysty pikir bildirdi, dep habarlaidy Sputnik Qazaqstan.
Qazaqstandyqtar arasynda tilge qatysty san alýan petitsiialar taralyp jatyr. Al keibir videolarda aldaǵy referendýmda tilge qatysty jasyryn sheshimniń qabyldanýy týraly aitylady.
Vitse-premer Eraly Toǵjanov osy máselege qatysty ár túrli pikir bar ekenin atap ótti.
"Biraq qandai da bir ózgeris jasaýǵa asa qajettilik joq. Sondyqtan aldaǵy referendýmda tilge qatysty másele shyǵarylmaidy", deidi ol.
"Memlekettik tildiń mártebesi burynnan beri bekitilgen. Qazir bul saiasi turǵyda qaralatyn másele emes, týǵan tildi tereńdetip zertteý kerek. Másele sonda. Men ózim elimizdiń barlyq azamaty aldymen memlekettik til – qazaq tilin bilýi kerek dep sanaimyn. Elimizdiń azamattary orys tilin de bilýi kerek. Óitkeni tarihi kórshimiz bar, shekaramyz da 7 myń shaqyrymǵa jýyqtaidy. Menińshe, elimizdiń azamattary bolashaqta aǵylshyn tilin de bilýge mindetti. Sol sebepti kóptegen mektepterde kóptildi oqytýǵa basymdyq beriledi. Bul – durys baǵyt", - dedi Toǵjanov senattaǵy parlamenttik tyńdaýdan keiin jýrnalisterge bergen suhbatynda.
Onyń aitýynsha, kóp til bilgen adam utylmaidy, kerisinshe, jan-jaqty damidy.
"Sondyqtan bul máseleni saiasatqa ainaldyrmaýdy suraimyn", - dep atap kórsetti Toǵjanov.
Aita keteri, Konstitýtsiiaǵa ózgeris engizýge arnalǵan respýblikalyq referendým 5 maýsymda ótedi. Biýlletende bir ǵana suraq bolady. Sonyń nátijesinde Ata zańymyzdyń úshten bir bóligine ózgeris engiziledi.
Referendýmnyń nátijesi resmi túrde jariialanǵan sátten bastap Konstitýtsiiaǵa ózgeris jasalady. Ol úshin arnaiy zań nemese jarlyq shyǵarýdyń qajeti joq.
