Nursultan Nazarbaev Qazaqstan Respýblikasynyń Konstitýtsiiasy kúnine arnalǵan halyqaralyq konferentsiiaǵa qatysýshylarmen kezdesti, dep habarlaidy "Ult aqparat" Aqordaǵa silteme jasap.
Memleket basshysy Qazaqstanǵa kelip, Konstitýtsiia kúnin birge merekelegeni úshin jiynǵa qatysýshylarǵa rizashylyq bildirdi, sondai-aq kóptegen halyqaralyq sarapshylar qatysqan bul konferentsiia quqyqtyq memleket qurý jóninde ilim-bilim almasýǵa zor múmkindik bergenin atap ótti.
«Biz konstitýtsiialyq qurylym isindegi yntymaqtastyq pen ózara tájiribe almasý múmkindigin joǵary baǵalaimyz. Qundy keńester men usynymdar úshin rizashylyq bildiremiz», - dedi Qazaqstan Prezidenti.
Elbasy táýelsizdik alǵan sátten bastap Qazaqstandaǵy konstitýtsionalizmniń damý tarihyna toqtaldy.
«1995 jylǵy kóktemde bir top zańger ǵalymdarmen birlesip, bizge qandai konstitýtsiia qabyldaý qajettigin talqyladyq. Men ózim elimiz úshin qolaily erejelerdi izdestirý maqsatymen Eýropanyń, Amerika men Aziianyń 20 eliniń konstitýtsiialaryn jete zerttedim. Sebebi, biz basqa memlekettiń konstitýtsiiasyn sol kúiinde kóshirip ala almaimyz. Osylaisha, 1995 jylǵy jeltoqsanda jalpyhalyqtyq referendýmda azamattarymyzdyń basym kópshiligi qoldaǵan konstitýtsiiany qabyldadyq. Bul qujat búginde bizdiń ómirimizge arqaý bolyp, memleketimizdi qalyptastyryp, táýelsizdigimizdi nyǵaityp otyrǵan negizgi zańǵa ainaldy. Konstitýtsiiamyz ýaqyt talabyna sai únemi reformalanyp, jetildirilýde. Máselen, ótken jyldyń basynda men Prezidenttiń birqatar ókilettikterin Parlament pen Úkimetke olardyń derbestigin ári jaýapkershilik aiasyn keńeite otyryp qaita bólý jónindegi konstitýtsiialyq reformaǵa bastamashy boldym», - dedi Nursultan Nazarbaev.
Memleket basshysy Qazaqstannyń Negizgi zańnyń joǵary zańdyq kúshin qamtamasyz etý barysynda quqyq ústemdigin ornyqtyrý saiasatyn maqsatty túrde júrgizip otyrǵanyna toqtalyp, elimizdiń álemdik arenadaǵy jetistikteri onyń halyqaralyq bedelin jáne Konstitýtsiiamyzda belgilengen beibitsúigish syrtqy saiasi qaǵidattarymyzdyń tiimdiligin kórsetetinin atap ótti.
«Qazaqstannyń jetistikteri halyqaralyq qoǵamdastyq tarapynan moiyndalǵany aidan anyq. Biz shirek ǵasyr ishinde ekonomikamyzdy 22 ese ósirip, qazaqstandyqtardyń turmys sapasyn jaqsarttyq. Jurtshylyq ózderiniń dini saltyn erkin ustanyp, óz ana tilinde sóilei alatyn, sondai-aq mádenietin saqtaityn kópultty jáne kópkonfessiialy memleket qurdyq. Biyl Astanada ótetin Álemdik jáne dástúrli dinder kóshbasshylarynyń VI sezi sonyń dáleli», - dedi Qazaqstan Prezidenti.
Halyqaralyq sarapshylar Qazaqstanǵa shaqyrǵany úshin Nursultan Nazarbaevqa alǵys bildirip, Konstitýtsiia kúnin merekeleý túrli institýttar arasyndaǵy qatynastardy retteýdiń berik negizi ári quqyqtar men bostandyqtardy qorǵaýdyń kepili sanalatyn eń mańyzdy qujattyń máni zor ekenin aiǵaqtaitynyn atap ótti.
«Konstitýtsiia kúnin merekeleý azamattardyń, sonyń ishinde jastardyń arasynda konstitýtsiialyq qundylyqtardy dáriptep, taratýǵa baǵyttalǵan tárbielik sipattaǵy órkeniet belgisi sanalady. Sondai-aq, qoǵamdyq úilesimdilikti, tynyshtyq pen turaqtylyqty júzege asyrý jolyndaǵy umtylystyń baǵyty durys ekenin kórsetedi», - dedi Aljir Halyq Demokratiialyq Respýblikasy Konstitýtsiialyq keńesiniń tóraǵasy M.Medelchi.
Sońynda Memleket basshysy konstitýtsiialyq zańdylyqty qamtamasyz etý isindegi negizgi ról quqyq ústemdigin saqtaýdy kózdeitin konstitýtsiialyq ádilet organdaryna tiesili ekenin aitty.
Jiynǵa Qazaqstan Respýblikasy Konstitýtsiialyq keńesiniń tóraǵasy Q.Mámi, Ázerbaijan Respýblikasy Konstitýtsiialyq sotynyń tóraǵasy F.Abdýllaev, Aljir Halyq Demokratiialyq Respýblikasy Konstitýtsiialyq keńesiniń tóraǵasy M.Medelchi, Armeniia Konstitýtsiialyq sotynyń tóraǵasy G.Tovmasian, Bolgariia Konstitýtsiialyq sotynyń tóraǵasy B.Velchev, Latviia Respýblikasy Konstitýtsiialyq sotynyń tóraǵasy I.Ziemele, Konstitýtsiialyq ádil sot jónindegi dúniejúzilik konferentsiianyń Bas hatshysy Sh.Diýrr, Eýraziialyq Ekonomikalyq Odaq sotynyń tóraǵasy J.Báiishev, Qazaqstan Respýblikasy Prezidenti Ákimshiligi basshysynyń orynbasary Á.Raqysheva qatysty.
