Konstitýtsiia qoǵamnyń negizgi tiregin nyǵaitady. Mundai pikirdi QR Prezidenti janyndaǵy Qazaqstannyń strategiialyq zertteýler institýty direktorynyń orynbasary, zań ǵylymdarynyń doktory Marat Jumaǵulov bildirdi, dep habarlaidy QazAqparat
«Qazaqstan Respýblikasy Konstitýtsiiasynyń 25 jyldyǵyn atap ótken kezde onyń oń tájiribesin qarastyryp ári baiyta otyryp, konstitýtsiialyq-quqyqtyq saladaǵy quqyqtyq institýttardyń pármendiligin saraptaý qajet. Ol óziniń quqyqtyq damýyn, Ata zańymyzdyń áleýetin odan ar paidalaný boiynsha sharalar ázirleýdi talap etedi», - dedi ol.
Onyń aitýynsha, Konstitýtsiia jalpyqamtymdy zań retinde qoǵam men memlekettiń, adam quqyǵynyń, ortalyq jáne aýmaqtyq memlekettik organdar júiesiniń negizgi tiregin bekitedi.
«Konstitýtsiia mazmunyndaǵy mańyzdy quqyqtyq institýttardan jergilikti ózin-ózi basqarý institýtyn bóle qarastyrýǵa bolady. 89-baby 2-tarmaǵyna sáikes, Jergilikti ózin-ózi basqarýdy turǵyn halyq tikelei sailaý jolymen, sondai-aq halyq toptary jinaqy turatyn aýmaqty qamtityn selolyq jáne qalalyq jergilikti qaýymdastyqtardaǵy sailanbaly jáne basqa jergilikti ózin-ózi basqarý organdary arqyly júzege asyrady», - dedi sarapshy.
Onyń atap ótýinshe, bir jaǵynan ózin-ózi basqarý organdary el basqarýdyń biryńǵai júiesimen yqpaldastyrylǵan. Jergilikti ózin-ózi basqarýdyń negizgi zańdar men ózge de quqyqtyq aktiler arqyly qoldanysta bolatyn apparaty bar jáne biýdjet qalyptastyrýǵa qatysady. Máselen, QR Biýdjet kodeksiniń 52-1-baby 2-tarmaǵy 3-tarmaqshasyna sáikes, aýdandyq mańyzy bar qalanyń, aýyldyń, kenttiń, aýyldyq okrýgtiń kommýnaldyq menshiginen (jergilikti ózin-ózi basqarýdyń kommýnaldyq menshiginen) túsetin kirister aýdandyq mańyzy bar qala, aýyl, kent, aýyldyq okrýg biýdjetterine túsetin túsimder bolyp tabylady.
Ekinshi jaǵynan jergilikti ózin-ózi basqarý azamattyq qoǵamnyń mańyzdy elementi, jekelegen qoǵamdastyqtardyń saiasi ózin-ózi uiymdastyrý formasy sanalady.
