KSRO áli de bar jáne TMD-nyń barlyq elderi zańdary boiynsha ómir súretin legitimdi memleket bolyp tabylatyny týraly teoriia Jeli paidalanýshylary arasynda keńinen tanymal. Bul joly osy ideia ýkrain diplomaty Sergei Kislitsanyń BUU Qaýipsizdik Keńesinde sóilegen sózimen «rastalyp» otyr. Shyn máninde, onyń sózderi KSRO-nyń bar ekenin qýattamaidy, - dep habarlaidy Stopfake.
Diplomat jáne Ýkrainanyń BUU janyndaǵy turaqty ókili Sergei Kislitsa BUU-da sóilegen sózinde Reseidiń Qaýipsizdik Keńesine múshe bolýyna kúmán keltirdi.
Alaida, ol óz sózinde KSRO-nyń bar ekendiginiń dálelderine emes, Keńes Odaǵy ydyraǵannan keiin Resei Federatsiiasy eshqandai daýysqa salmastan, KSRO-nyń murager eli retinde Qaýipsizdik Keńesiniń bes turaqty múshesiniń biri esebinde Odaqtyń ornyn alǵandyǵyna súiendi.
Mysaly, Qytaimen de osylai boldy. Qytai Respýblikasy Qytai Halyq Respýblikasyna ainalǵannan keiin, ol eshqandai daýys berýsiz Qaýipsizdik Keńesinde turaqty múshe boldy.
Resei Federatsiiasy 1991 jylǵy jeltoqsanda qol qoiylǵan Almaty deklaratsiiasyna sáikes KSRO-nyń quqyqtyq murageri bolyp sanalady. Onda TMD printsipteri jáne KSRO-nyń óz qyzmetin toqtatqany týraly jazylǵan. Bul deklaratsiia Belovej kelisiminiń jalǵasy jáne nyǵaiýy bolyp tabylady, onda KSRO-nyń ydyraýy men Táýelsiz memleketter dostastyǵynyń qurylýy faktileri aiqyndalǵan.
Bul qujattar 1991 jylǵy 8 jeltoqsanynan bastap Keńestik Sotsialistik Respýblikalar Odaǵy joq ekenin dáleldeidi.
Demek, KSRO-nyń áli de legitimdi memleket ekendigi týraly teoriialar – belgili tarihi faktilerge qaishy keletin feik jáne konspirologiia.
