AQSh Kongresi ókilder palatasynyń múshesi demokrat Djon Liýis.
AQSh Kongresiniń segiz múshesi eldiń jańadan sailanǵan prezidenti Donald Tramptyń resmi túrde qyzmetine kirisý rásimine qatyspaityndaryn málimdegen. Olardyń keibiri Donald Tramptyń prezident sailaýynda jeńiske jetýine Resei kómektesken dep sanaidy.
NBC telearnasy efirinen qańtardyń 15-inde kórsetiletin suhbatta AQSh Kongresi ókilder palatasynyń múshesi, azamattyq quqyqtar úshin kúresken qozǵalys ardageri demokrat Djon Liýis Trampty zańdy sailanǵan prezident dep moiyndamaityny týraly málimdegen. AQSh-taǵy prezident sailaýyna Reseidiń yqpal etkeni týraly barlaý málimetteri jónindegi habarlarǵa qatysty pikir bildirgen ol demokrattardan prezidenttikke kandidat Hillari Klintonnyń sailaýda jeńilýin naq osy jaitpen bailanystyrǵan.
Kongrestiń ózge músheleri Tramp áielder týraly, áleýmettik azshylyqtar men sheteldikterge qatysty "ádepsiz" sózder aitqany úshin onyń inaýgýratsiiasyna qatysqylary kelmeitindigin aitqan.
Azamattyq quqyqtar úshin qozǵalys belsendileri qańtardyń 20-syna belgilengen Donald Tramptyń inaýgýratsiiasy aldynda narazylyq aptasyn bastamaqshy. "Ulttyq áreket" qozǵalysy jetekshisi Al Sharpton senbi kúni Vashingtonda bastalatyn sherýge óz jaqtastary jáne ózge de birneshe qozǵalys ókilderi qatysatyny týraly málimdedi. Onyń sózinshe, bul sherý Aq úidegi bilikke keletin jańa ákimshiliktiń eldegi sailaý quqyǵy, áleýmettik qorǵaý men meditsinalyq saqtandyrý jáne qylmystyq quqyq salalaryndaǵy reformalardan bas tartýyna, sonymen qatar immigranttar qaýymdastyǵyna qarsy sharalardy kúsheitýine jol bermeý maqsatyn kózdeidi.
