AQSh kongresiniń ókilder palatasyndaǵy ondaǵan demokrat prezident Djo Baidendi Kýbadaǵy Gýantanamo áskeri túrmesin jabýǵa shaqyrdy. Mundai úndeý 5 tamyzda – 11 qyrkúiek kúngi teraktige 20 jyl tolýyn atap ótetin kún qarsańynda jasaldy. Atalǵan túrme 2001 jylǵy iri teraktiden keiin ashylǵan edi.
Prezidentke hat jazǵan 75 demokrat onda túrmeniń ashyq turǵany memlekettiń bedeline nuqsan keltiredi, AQSh-tyń adam quqyǵy men zań ústemdigin qorǵaý qabiletine ziianyn tigizedi dep atap ótken.
"Biz sizden túrmeni túpkilikti túrde jabý úshin qajetti qadam jasaýyńyzdy, ol jaqtaǵy adamdar sanyn qysqartyp, qalǵan tutqyndarmen adam siiaqty qarym-qatynas jasaýyn qadaǵalaýdy, Gýantanamodaǵy áskeri komissiia jumysynda ashyqtyqty qamtamasyz etýdi suraimyz" dedi palata músheleri.
Kongressmenderdiń málimetinshe, túrme ashylǵaly beri onda shamamen 800 tutqyn jazasyn ótegen. Qazir 39 er adam qalǵan. Kóbi qartaiǵan.
Hatta demokrattar 2009 jyly vitse-prezident bolyp turǵan tusta Baidenniń Gýantanamo túrmesin jabý týraly bastamany qoldaǵanyn eske salyp, qańtar aiynda prezident qyzmetine kiriskennen keiin Baiden pozitsiiasynyń ózgermegenin rastady dep jazǵan.
Gýantanamoda tanymal tutqyndardyń biri – AQSh-ta 11 qyrkúiek kúngi teraktini uiymdastyrdy dep aiyptalǵan Halid Sheih Mohammed jazasyn ótep jatyr.
