Mádeniet jáne sport vitse-ministri Nurǵisa Dáýeshov «Reseilik kinorejisser Egor Konchalovskii Abai týraly film-opera túsiredi» degen alyp-qashpa áńgimege núkte qoidy, dep habarlaidy QazAqparat.
Aita ketsek, buǵan deiin reseilik kinorejisser Egor Konchalovskiidiń Abai Qunanbaiuly týraly film-opera túsiretini týraly aqparat taraǵan bolatyn. Bul jańalyqtyń áleýmettik jelide birshama qyzý talqylanǵany belgili. Máselen, belgili ónertanýshy Erlan Tóleýtaidyń jazýynsha, «uly aqynnyń ómiri men shyǵarmashylyǵyn múlde bilmeitin adam Abai týraly film túsire almaidy».
Al rejisser Talǵat Temenov «Abaidy túsiretin adam - qazaqtyń dástúrin, mádenietin, ádebietin, al, eń bastysy, Abai ómir súrgen zamannyń egjei-tegjeiin biletin maman bolýy shart» degen edi.
Konchalovskiidiń Abai týraly film túsiretini ras pa? Tilshimizdiń osy suraǵyna Mádeniet jáne sport vitse-ministri Nurǵisa Dáýeshov jaýap berdi.
«Egor Konchalovskii men Mádeniet jáne sport ministrligi arasynda film-opera túsirý týraly eshqandai kelisimshart bolǵan joq. Bolmaidy da! Qazirgi tańda ondai másele qozǵalyp jatqan joq. Aqparattar aǵymy zamanynda ol áńgimeniń qaidan shyǵyp ketkeninen de habarsyzbyz. Zańdy túrde ministrlik pen rejisserdiń arasynda film-opera túsirý boiynsha másele qaralyp jatqan joq», - dedi Nurǵisa Dáýeshov.
Al jalpy, Abai týraly film túsirý josparda bar ma? Bul suraqqa jaýap bergen Nurǵisa Dáýeshov qazir usynystar qabyldanyp jatqanyn aityp ótti.
«Memleket basshysy Abaidyń 175 jyldyǵyna orai bergen tapsyrmasyna sáikes, birshama jospar-joba barshylyq. Ulttyq kinony qoldaý ortalyǵy qazir búkil el boiynsha usynystardy qabyldap jatyr. Bul turǵyda kórkem film nemese derekti film sipatynda ideialar barshylyq. Ol usynystardyń bárin Ulttyq kinony qoldaý ortalyǵyndaǵy sarapshylar komissiiasy qaraidy. Iaǵni, ol bir adamnyń bekitetin sharýasy emes. Sarapshylar komissiia stsenariilerdiń bárin talqylaǵannan keiin qorytyndy shyǵaryp, ary qarai jumys barysy júrgiziledi. Al qazirgi tańda «myna bir rejisser túsiredi» degen másele joq. Usynystardyń bári tereń talqydan ótedi», - dedi ol.
Onyń aitýynsha, reseilik kinorejisser Egor Konchalovskiidiń tarapynan Ulttyq kinony qoldaý ortalyǵyna eshqandai usynys túspegen.
«Kóp rejisserge usynys bildirdik. Abai jaily kórkem nemese derekti film túsirý - bir jyldyń sharýasy emes. Bul iske Abaidyń filosofiiasyn asha alatyndai úlken daiyndyqpen kelýimiz kerek. Árbir stsenarii baiyppen qaralady. Sebebi, Abai jaily atústi, asyǵys film túsirsek, uly aqynnyń ultqa qaldyrǵan murasyn halyqqa kino tilinde jetkize almai qalýymyz múmkin. Ekinshiden, Abai jaily derekti filmder boiynsha usynystar qabyldanyp jatyr. Ony biyl túsirý josparda bar», - dep túidi Nurǵisa Dáýeshov.
