Sheteldikter bes kúnniń ishinde Qazaqstanda tirkelý týraly mindetten bosatylady. Bul sharalar qonaqúilerge mindettelmek. Bul týraly QR Bas prokýrorynyń orynbasary Marat Ahmetjanov málim etti, dep habarlaidy "Ult aqparat".
«Búginde shetel azamattary bes kún ishinde kóshi-qon organdarynda tirkeýden ótýi tiis. Endi bul norma joiylady. Qonaqúiler jáne qabyldaýshy tarap shetel azamatynyń kelgeni jaiynda kóshi-qon organdaryna ózderi habarlaýy tiis bolady. Bul óz kezeginde Qazaqstannyń qonaqjailyǵyna ońtaily áser etedi. Ózderińiz bilesizder, buǵan deiin kóńil kónshitpeitin oqiǵalar bolǵan, iaǵni qonaqúiler tekserilip, reidter barysynda azamattardyń tirkeýi tekserilgen edi. Osy jaǵdailar investitsiialyq tartymdylyqqa áser etip, basqa da saldarǵa alyp kelýi múmkin», - dedi M. Ahmetjanov Senatta tilshiler saýalyna jaýap bere otyryp.
Onyń sózine qaraǵanda, endi qabyldaýshy tarap kóshi-qon organdaryna qonystanǵan adamdar týraly málimet berýge mindetti bolady, al shetel azamattary bul mindetten bosatylady. Eger de qabyldaýshy tarap nemese qonaqúi tiisti aqparatty bermese, onda ákimshilik kodekstegi jaýapqa tartylady.
«Basty maqsat - sheteldik týristerdi osyndai mindetten bosatý. Shetel azamattary tirkeletin organdy izdep, áýrege túspeidi. Bul norma tek shetel azamattaryna qatysty bolyp otyr», - dedi Bas prokýrordyń orynbasary.
