Foto: kmg.kz
«QazMunaiGaz»
ulttyq kompaniiasynyń burynǵy basqarma tóraǵasy Maǵzum Myrzaǵaliev QR Prezidenti
Qasym-Jomart Kemeluly Toqaevqa qoldaýy men senimi úshin alǵys bildirdi, dep
habarlaidy «Ult aqparat».
«Munai-gaz salasynda túrli deńgeide eńbek etken maman retinde kompaniiany eki jyl boiy basqarý men úshin úlken jaýapkershilik júktegen abyroily mindet boldy. Prezident Qasym-Jomart Kemeluly Toqaevqa qoldaý bildirip, senim artqany úshin alǵys aitamyn.
Bul jazbamen atqarylǵan jumysty tolyq qamtý múmkin emes, dese de negizgi nátijelerge toqtalyp ótsem. Kompaniia osy ýaqyt ishinde halyqaralyq seriktestermen birlesip birqatar aýqymdy jobany qolǵa aldy, munai tasymalynda jańa baǵyttar iske qosyldy, elimizde birneshe óńirde geologiialyq barlaý jumystary bastaldy. SIBÝR jáne Sinopec sekildi álemdegi jetekshi kompaniialarmen Atyraý oblysynda qýaty 1,25 mln tonna polietilen óndirý jónindegi jobany iske asyrý úshin birikken kásiporyn quryldy», - dep jazdy Maǵzum Myrzaǵaliev Tvitter paraqshasynda.
Aitýynsha, KEBCO (Kazakh Export Blend Crude Oil) otandyq munai brendiniń paida bolýy kompaniia úshin ǵana emes, otandyq munai-gaz salasyndaǵy mańyzdy oqiǵalardyń biri boldy.
«Bastapqyda KEBCO Brent-ke jeńildikpen (barreline shamamen $20) saýdalansa, qazir otandyq munai markasy Brent-ten $2 qymbatqa baǵalanady. Prezidenttiń saiasi sheshiminiń arqasynda otandyq munai eksportynyń baǵyttaryn ártaraptandyrý boiynsha jumys bastaldy. Osylaisha, Qazaqstan munaiy «Baký-Tbilisi-Djeihan» munai qubyrlary arqyly, sondai-aq «Dostyq» qubyry arqyly Germaniiaǵa tasymaldanatyn boldy. AD Ports Group kompaniiasymen birlesken kásiporyn quryldy, 2023 jyly qarashada 2 tanker satyp alyndy. Taraz jáne Liwa tankerleri Aqtaý portynan Mahachkalaǵa 48 reis jasap úlgerdi. Odan ári Kaspiide keme jasaý zaýytyn ashý josparlary bar.
Kompaniianyń uzaq merzimdi damýy úshin resýrstyq bazanyń mańyzyn eskere otyryp, Ózen ken ornyn ońaltý jobasy qolǵa alyndy. Óndiristi arttyryp, ken ornyn ońaltý úshin jańa tehnologiialar tartylýda», - dep jazdy «QMG» eks-basshysy.
Sondai-aq ol QMG-nyń
geologiialyq barlaýdy damytý tujyrymdamasy qaita qaralǵanyn atap ótti.
«Nátijesinde «Qaraton Podsolevoi» jáne «Torǵai Paleozoi» jobalary boiynsha biyl tereń uńǵymalardy burǵylaý jumystary josparlanyp otyr.
Memleket basshysynyń bitým óndirisin ulǵaitý jónindegi tapsyrmasyn oryndaý aiasynda Caspi Bitum zaýytynyń qýatyn jylyna 500 myń tonnadan 750 myń tonnaǵa deiin arttyrý jobasy qolǵa alyndy.
Ulttyq kompaniia IPO-ǵa shyǵyp, aktsiialaryn alǵash ret halyqqa usyndy. Bul qazaqstandyq KASE jáne AIX qor birjalaryndaǵy eń iri IPO boldy. QazMunaiGaz aqtsiialary jariialanǵan kezden bastap 50%-dan astam ósim kórsetip otyr.
Kompaniia óz kásiporyndary ornalasqan óńirlerde áleýmettik jobalardy belsendi júzege asyryp keledi. Qazirgi kezde Oral qalasynda sport ortalyǵynyń qurylysy júrip jatyr. Mańǵystaý oblysynda birneshe sport alańy salyndy», - dep jazdy Maǵzum Myrzaǵaliev.
Sonymen qatar ol QMG tasqyn sý saldaryn joiý jumysyna qoldaý kórsetýdi jalǵastyryp jatqanyn jetkizdi.
«Elimizdiń turaqty bolashaǵyna úles qosyp otyrǵan kompaniianyń ár qyzmetkerine alǵys aitamyn. QMG el qazynasyn toltyryp otyrǵan eń iri salyq tóleýshilerdiń biri retinde elimizdiń kemel keleshegine óz úlesin qosyp keledi. Iske asqan barlyq joba elimizdiń energetikalyq qaýipsizdigin qamtamasyz etý, Qazaqstannyń damýy men órkendeýi jolynda tabiǵi resýrstardy tiimdi ári utymdy igerý jónindegi kompaniianyń missiiasyn oryndaýǵa baǵyttalǵan.
Ashat Ǵalymulyn jańa qyzmetimen quttyqtaimyn. Ol – munai-gaz salasynda mol tájiribesi bar kásibi maman. Jumysyna sáttilik tileimin!», - dep túiindedi sózin «QMG» eks-basshysy.
