Qazaqstan kommýnistik halyq partiiasy Qordai aýdanyndaǵy jappai tóbelesten qaza bolǵan azamattardyń otbasyna kóńil aitty, dep habarlaidy QazAqparat partiianyń Facebook paraqshasyna silteme jasap.
«Qazaqstan kommýnistik halyq partiiasy Jambyl oblysynyń Qordai aýdanyndaǵy tártipsizdik saldarynan qaza bolǵan azamattardyń otbasyna qaiǵyryp kóńil aitady. Kommýnister adam shyǵyny oryn alǵan oqys oqiǵa obektivti túrde tekserilip, kináliler qatań jaýapqa tartylýy tiis dep sanaidy. Biz internatsionalizm ideiasy men halyqtar baýyrlastyǵy nasihattalatyn kópultty elde buzaqylardyń bassyzdyǵy túrli etnostar arasynda qalyptasqan dostyq qarym-qatynasqa syna qaǵa almaitynyna senemiz», - dep jazady partiia.
Kommýnister qazaqstandyqtardy arandatýshylyqqa urynbaýǵa shaqyrdy.
«Biz aqyl - jeńedi, ashý - basylady, shyndyq - anyqtalady, quqyq qorǵaýshylar kinálilerdi taýyp, jazasyn beredi, al baýyrlarymyz ben qaryndastarymyzdyń shańyraǵyna tynyshtyq ornaidy dep úmittenemiz. Qazaqstan - bizdiń ortaq úiimiz, árqaisymyz onyń qaýipsizdigi men turaqtylyǵyna jaýaptymyz. Bizdiń qýatymyz bizdiń tutastyǵymyzda. Biz birge bolǵanda ǵana syn-qaterlerge tótep beremiz», - deidi partiia basshylyǵy.
Qazaqstan kommýnistik halyq partiiasy tergeý jumystarynyń obektivtiligin baqylaýda ustaidy jáne qoǵamdyq qaýipsizdik salasyndaǵy memlekettik saiasattyń tiimdiligin arttyrýdy talap etedi.
