Qazaqstan kommýnistik halyq partiiasy Aýǵan soǵysy ardagerleriniń máselesin kóterip, «Ardagerler týraly» zańǵa túzetýlerdi engizýdi usynbaq, dep habarlaidy QazAqparat.
Elordada Qazaqstan kommýnistik halyq partiiasy men Qazaqstannyń internatsionalist-jaýyngerleriniń ardagerler uiymdary ortalyq keńesiniń jiyny ótti. QKHP OK hatshysy, QR Parlamentindegi atalmysh partiia fraktsiiasynyń jetekshisi Aiqyn Qońyrov jiynnyń ne úshin uiymdastyrylyp otyrǵanyn aityp berdi.
«Elimizde «Ardagerler týraly» zań qabyldandy. Búgingi kúni oǵan qol qoiylyp, qujat negizinde jumys bastalyp ketti. Alaida osy jyldyń jazynda bizdiń oblystyq qurylymdarǵa internatsionalist-jaýyngerler júginip, atalmysh zańǵa túzetýler engizý týraly usynystaryn jetkizdi. Taldaý barysynda Qazaqstan kommýnistik halyq partiiasy osy túzetýlerdi qoldaý týraly sheshim qabyldady. Tiisinshe biz ardagerlerdiń áleýmettik qorǵalýyn, baspanamen qamtý, qosymsha járdemaqymen (aýǵan soǵysy ardagerlerin) qoldaý, túptep kelgende mártebesin aiqyndaý bastamasyn kóterýdi jón kórdik», - dedi ol QKHP Nur-Sultan qalalyq komitetiniń keńsesinde ótken otyrysta.
Aýǵan soǵysy ardagerleri ortalyq keńesiniń múshesi Qairat Elýbaevtyń aitýynsha «Ardagerler týraly» zań boiynsha aýǵan soǵysynyń ardagerleri Úkimetpen birge 2007 jyldan beri jumys júrgizilip jatyr.
«2020 jyly zańdy talqylaý kezinde aýǵan soǵysy ardagerleri uiymdarynyń músheleri shaqyrylmaǵan. Ol zańda bizdiń usynystar qabyldanbady. Sol sebepti bizdiń ortalyq keńestiń sheshimimen bul zańdy jetildirý kerek dep sanaimyz. Jalpy aýǵan soǵysy ardagerleriniń mártebesin durystap aiqyndaý kerek. Zańdy talqylaý kezinde aýǵan soǵysynyń ardagerleri áleýmettik jeli bolsyn, videoótinim bolsyn ózderiniń narazylyqtaryn aityp kele jatyr», - deidi ol.
Qairat Elýbaev aýǵan soǵysyna 22 myńnan astam qazaqstandyq qatysqanyn, sonyń búgin de 16-17 myń adamy qalǵanyn aitady.
«18-20 jas aralyǵyndaǵy jastar sol ýaqytta soǵysqa bardy. 30 jyl boiy bizge naqty «soǵysqa qatysýshy» degen mártebe berýdi suradyq. Biraq usynystarymyz eskerilmei keledi. Halyqtyń, Prezidenttiń jáne Parlamenttiń aldyna osy máseleni qaita kótereiik dep jatyrmyz», - deidi ol.
