AQSh-tyń Reseidegi elshiliginiń baspasóz hatshysy Rebekka Ross eline qaitarylady. Bul týraly reseilik "Kommersant" basylymy jazdy. Basylymnyń málimetinshe, Ross Vashingtonnyń osy sekildi qadamyna jaýap retinde Máskeý elden shyǵaratyn on amerikalyq diplomat tizimine engen.
Resei SIM-indegi qupiia derekkózge súiengen "Kommersant" AQSh elshiliginiń baspasóz hatshysy persona non grata tizimine engenin jazady. Sebebi, Amerika biligi de jarty jyldan beri Máskeýge Vashingtondaǵy elshiliginde hatshy qyzmetin taǵaiyndaýǵa múmkindik bermei keledi. Amerika taraby kandidattyń vizaǵa tapsyrǵan qujatyn esh sebepsiz qaitarǵan.
15 sáýirde AQSh sailaýǵa kilikkeni úshin jáne jalǵan aqparat taratqany úshin Reseige sanktsiia salǵan. "Qara tizimge" Reseidiń 30-dan astam azamaty men kompaniiasy engen. Sanktsiia AQSh-tan reseilik dipmissiianyń ondaǵan qyzmetkerin elden shyǵarýdy qarastyrady.
23 sáýirde Resei biligi AQSh diplomatiialyq missiiasyna shetel azamattaryn jumysqa alýǵa tyiym salǵan. "Kommersant" 1986 jyly Máskeýdiń Vashingtonǵa dál sondai shekteý qoiǵanyn eske salady. Ol kezde Amerika elshisi jumysyna ózi baryp, qonaqtarǵa áieli qyzmet kórsetken. Diplomatiialyq missiianyń ózge qyzmetkerleri asúi, garaj jáne baý-baqshada jumys istegen.
