QR QM Memlekettik kirister komiteti zeinetaqy tólemderine salyq salý jóninde azamattardan kelip túsip jatqan ótinishter men suraýlarǵa bailanysty, qosarlanǵan salyq salý týraly alańdaýǵa negiz bar ma, osyǵan túsindirme berdi, dep habarlaidy "Ult aqparat".
Agentter (jumys berýshiler) jeke tulǵalardan ustap qalǵan mindetti zeinetaqy jarnalaryna jeke tabys salyǵy (JTS) salynbaidy, dál osyndai tártip mindetti kásiptik zeinetaqy jarnalaryna da qatysty. Zeinetaqy jarnalarynyń somasyn ustap qalý kezinde JTS salynbaýyna bailanysty zeinetaqy jinaqtarynyń somasyna tólegen kezde bir ret qana salyq salynady, tiisinshe qosarlanǵan salyq salýǵa jol berilmeidi, dedi QR QM Memlekettik kirister komitetinde.
Sondai-aq, Memlekettik kirister komitetinde ekinshi tásilmen tólenetin birjolǵy zeinetaqy tólemderine salyq salý tártibine qatysty egjei-tegjeili aityp berdi. Bul tásil BJZQ belgilegen keste boiynsha (zeinetaqy aýdarý bastalǵan kelesi aidan bastap) 16 jyldan aspaityn merzim ishinde ai saiyn teń úlestermen JTS ustap qalýdy kózdeidi.
Tolyqtai túsiný úshin bul tásildi mysal retinde qarastyrýdy usynylǵan.
Mysal keltireiik:
salymshynyń JZSh-syndaǵy zeinetaqy jinaqtarynyń somasy = 8 500 000 teńge, jetkiliktilik shegi = 3 500 000 teńge,
birjolǵy zeinetaqy tólemi = 5 000 000 teńge (8 500 000 -3 500 000),
eseptelgen JTS somasy = 5 000 000 (tolyq kólemde) * 10%= 500 000 teńge,
birjolǵy zeinetaqy tólemi túrindegi kiris somasy = 5 000 000 teńge,
JTS zeinetaqydan kelesidei túrde ustalady:
Eseptelgen JTS somasy 16 jylǵa, iaǵni 192 aiǵa bólinedi.
Sonymen, 500000/192 = 2604teńge – ai saiyn zeinetaqydan keiinge qaldyrylǵan JTS somasy ustalatyn bolady.
«Eger jeke tulǵa Qazaqstan Respýblikasynan tys jerlerge turaqty turýǵa ketýge nemese zeinetaqy jinaqtarynyń somalaryn saqtandyrý uiymdaryna aýdarýǵa sheshim qabyldasa, onda keiinge qaldyrylǵan jeke tabys salyǵynyń somasy tolyq birjolǵy tólemmen ustalatyn bolady.
Eger jeke tulǵa qaitys bolsa – osy jeke tulǵanyń muragerlerinen muraǵa qalǵan zeinetaqy jinaqtarynan, keiinge qaldyrylǵan jeke tabys salyǵynyń somasy bir ret ustalatyn bolady», - dep tolyqtyrdy QR QM MKK-niń Baspasóz qyzmetinde.
