Keshe M.Áýezov atyndaǵy memlekettik akademiialyq drama teatrynda dramatýrg M.Omarovanyń “Kómbe nannyń dámi” dramasynyń premerasy ótti. Spektaklde soǵys jyldaryndaǵy Qazaq jerindegi túrli ult ókilderiniń bir-birine degen baýyrmashyldyǵy, ashqursaq Qazaq halqynyń jer aýdarylyp kelgenderge jarty nandy bólip bergen meirimdiligi sýretteledi. Oqiǵaǵa arqaý bolǵan ózekti máseleler diýana shaldyń ashy aiqaiymen bastalyp, uldarynan qara qaǵaz kelgen analardyń muń-zarymen ári qarai jalǵasady. Qoiylymda halyqqa tóngen náýbet, jastar arasyndaǵy mahabbat, adamnyń jamany bolsa da, ulttyń jamany bolmaidy qaǵidasyn ustanǵan nemis shal, áskeriler, aýyl adamdarynyń obrazdary sátti bailanysyp, kórermenderdi eliktirip áketedi.
“Teatr kóktemi-2017” festivali aiasynda kórsetilgen premeraǵa shetelden arnaiy shaqyrylǵan teatr synshylary qatysyp, shyǵarmashylyq quram jumysyna joǵary baǵa berdi. Qiiamet-qiynshylyǵy qazaqtyń moinyna shylbyr bolyp ilingen, sumdyǵymen tarihta qalǵan Keńes ókimetiniń saiasatyna qaishy bolyp kóringen ulttardy týǵan jerinen aiyryp, jer aýdartý, ózderi ash-jalańash qalsa da, pana izdegen jurtty syrtqa teppegen qazaq halqynyń boiyna ǵana tán uly qasietterdi ulyqtaityn qazaq sahnasyndaǵy qoiylymdar jii qaitalanýy kerek ekenin basa aitty.Astana Jastar teatrynyń direktory N.Jaqypbai "Kómbe nannyń dámi" spektakliniń premerasymen teatr ujymyn quttyqtap, bul qoiylym arqyly jańa kompozitordy tanyǵanyn, kórip qýanǵanyn jetkizip, Á. Omarovanyń eńbegin joǵary baǵalady. O. Qyiqymov, D. Temirsultanova, B. Qaptaǵai, Sh. Asqarova, Q. Beiseǵaliev, M. Muhtaruly, B. Qoja, G. Jaqypova, D. Anarbai, D. Úsenova, D. Júsip, B. Manjigitov, A. Satybaldieva, A. Bekjanov syndy teatr artisteriniń akterlik ansambline kórermen yqylasy joǵary boldy. Ilia atyndaǵy Memlekettik ǵylymi zertteý ýniversitetiniń basshysy, Ónertaný doktory, Lasha Chhartishvili D. Júsiptiń akterlik sheberligin kásibi túrde joǵary baǵalap, óz yqylasyn jetkizdi. Qazaqstannyń eńbek sińirgen qairatkeri A.Kákishovanyń rejisserligimen sahnalanǵan qoiylym kelgen qonaqtar men kórermenderdiń ystyq yqylasyna bólendi.
Spektakldiń alǵashqy premerasy 17 naýryz kúni ótti. Kelesi premera 19, 25 naýryz kúnderi ekenin habarlaimyz.
M.Áýezov teatrynyń baspasóz qyzmeti
