Tanymal pediatr dáriger Evgenii Komarovskiidiń aitýynsha, áleýmettik ara qashyqtyqty ustaý múmkin emes jerde mindetti túrde maska taǵý kerek. Ol koronavirýs indeti kezinde mektepte sabaq oqýǵa qatysty pikir bildirdi, dep habarlaidy QazAqparat.
«Balalar, árine, mektepte oqýy kerek. Ár synypta termometr men gigrometr bolýy tiis. Aýa temperatýrasy 18-20 gradýs, al ylǵaldylyq mólsheri 60 bolýy kerek. Bul Qazaqstan Respýblikasynyń zańynda bar. Sabaq ýaqyty 45 minýt emes, 30 minýt bolýy qajet. Synypty jii jeldetip turý, múmkindik bolsa, eki aýysymmen oqý kerek. Dene shynyqtyrý sabaǵy kúnde jáne ashyq aspan astynda bolýy tiis», - deidi Komarovskii.
Dárigerdiń aitýynsha, bir jyldan keiin áldeqaida jeńil bolady jáne koronavirýs dárigerler úshin qalai emdeý kerek ekeni belgili aýrý túrine ainalady.
«Biz túbi osyǵan kelemiz. Jaqsy kóretin adamdaryńyzdy baǵalańyzdar. Qazaqstan turǵyndaryna bul synaqtan eńseni tik ustap ótýdi tileimin jáne ózderińizge «Men aýyryp qalmas úshin nemese aýrý jeńil ótýi úshin ne istedim?« degen suraq qoiyńyzdar. Sonda bári túsinikti bolady. Úidiń shańyn súrtip, jeldetip, taza aýada kóp bolyńyzdar», - deidi ol.
Ol qai memleket koronavirýspen jaqsy kúresip jatqany týraly aitý múmkin emes ekenin jetkizdi.
«Bizde koronavirýs týraly biryńǵai statistika joq. Aldymen biryńǵai statistikany shyǵarý kerek. Kóp jaǵdaida statistikaǵa saiasat áser etedi. Keibir memleket aýyrǵan jaǵdailardy kórsetedi, keibiri kórsetpeidi. Saqtandyrý kompaniialary qalai tóleitini qatty yqpal etedi. Bul faktiniń de áseri bar. Statistikanyń qorytyndysy koronavirýs jaǵdaiy aiaqtalǵanda ǵana shyǵady. Mysaly, shartty túrde Shvetsiiada 600 adam, al Daniiada 400 adam kóz jumǵanyn jazamyz. Osyndai kezde ár memlekettiń ereksheligin eskerýimiz kerek. Mysaly, Jańa Zelandiiada jaǵdai táýir bolǵan, biraq shekarany ashqannan keiin kúrt nasharlap ketti. Bizge koronavirýspen birge ómir súrip úirený kerek», - deidi dáriger.
