QR AShM Orman sharýashylyǵy men janýarlar álemi komitetiniń baspasóz hatshysy Sáken Dildahmet Facebook paraqshasynda Kólsai kólderinen medýza tabylǵanyn jariialady, dep habarlaidy "Ult aqparat".
Onyń aitýynsha, erekshe kúzetiletin territoriialarda «Balyq sharýashylyǵy ǵylymi-óndiristik ortalyǵy» JShS mamandary Orta jáne Tómen Kólsaidaǵy faýnany 2016-2019 jyl aralyǵynda zerttep keledi.
Atap aitqanda, gidrobiologiia men gidroanalitika zerthanasynyń qyzmetkerleri kól túbindegi mikroorganizmderdi baqylaýǵa alǵan.
«Orta Kólsai sýynan tushy sýda ómir súretin medýza tabylǵanda tań qaldyq. Bizdiń sý qoimalarynda bul jándikter óte sirek kezdesedi. Alaida sońǵy jyldary tushy sýda ómir súretin jylý súigish medýzalardyń barlyǵy jii aitylyp keledi. Bundai tirshilik iesi Shymkent janyndaǵy Toǵyz kólinen de tabylǵan», - dedi Sáken Dildahmet.
Mamandardyń pikirinshe, Limnocnida tanganyicae jáne Craspedacusta sowerbii medýzalarynyń sýda paida bolýyna sý temperatýrasynyń jailylyǵy yqpal etedi.
«Kólsaida jazda sý temperatýrasy 15-16 gradýstan aspaidy. Bul medýzalar úshin eń shekti temperatýra bolyp tabylady. Olardyń Kólsai kólderine qalai túskeni belgisiz. Bul medýzany kólge týristerdiń biri alyp kelgen bolar. Nemese bir qus ákelgen bolar. Tómengi temperatýrada medýzalardyń kóbeiýi aqylǵa syimaidy. Sebebi, Kólsai kólderinen medýzalar qaitalap tabylyp jatqan joq», - dedi ol.
Alaida mamandar osy erekshe kúzetiletin aimaqtyń faýnasyn barynsha baqylaýǵa alý kerektigin eskertedi.
