Sońǵy úsh jylda kollektorlarǵa qatysty 15-ke tarta qylmystyq is qozǵaldy. Bul týraly Senatta ótken dóńgelek ústel otyrysynda QR Bas prokýrorynyń kómekshisi Qairat Raisov málim etti, dep habarlaidy QazAqparat tilshisi.
«Sońǵy úsh jylda kollektorlarǵa qatysty 15 qylmystyq is boldy. Bul turǵyda olardyń dóreki is-qimyldaryna, málimetterdiń úshinshi adamdarǵa berilý jaǵdaiyna shaǵym aitylýda. Osy oraida kollektormen aradaǵy áńgimeniń aýdiojazbalary usynylýda, bul jazbalardan sumdyq sózderdi estýge bolady. Bul turǵyda osy áńgime kollektorlyq kompaniia qyzmetkerimen bolǵanyn naqtylai almaimyz, sebebi olar jeke nómirmen bailanysqa shyǵady. Osyndai shaǵymdardy Ulttyq bankke usynamyz», - dedi Q. Raisov.
Osy oraida, ol Bas prokýratýra bul máselelerde turǵyndardyń quqyqtaryn qorǵaý aiasynda tiisti sharalardy pysyqtap jatqanyn aitty.
«Óz qyzmetin zańnama aiasynda atqaratyn kollektorlyq kompaniialar bar, sondai-aq jumysyn adal atqarmaityndar da kezdesedi. Iaǵni, bul salada zańnamaǵa qaishy ádisterdi paidalanatyndar arasynda burynǵy bandylar da bar», - dedi Bas prokýratýra ókili.
Q. Raisov osy baǵyttaǵy jumysty jetildirý úshin tiisti usynystaryn aitty.
«QR Ulttyq bankine birneshe usynys bar. Kollektorlardyń zańsyz áreketine tap bolyp júrgen adamdar kezdesedi. Bul rette qorqytý, jábirleý kezinde turǵyndar qaida shaǵymdaný kerektigin bilmeitindigi anyqtaldy. Meniń oiymsha, Ulttyq bankte jedel bailanys jelisi boiynsha usynys bolýy kerek», - dedi ol.
