Kolledjderde oqý merzimi qysqartylady. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Tehnikalyq jáne kásiptik bilim berý salasynda barlyq jasqa qajetti mamandyqtar boiynsha kolledjderde tegin oqýǵa múmkindik beriledi. 2017 jyldan beri tegin tehnikalyq bilim berýmen qamtý ulǵaidy. Biraq áli de 50 myńǵa jýyq stýdent aqyly bólimge oqýǵa túsedi. Osyǵan orai 2025 jylǵa deiin jastardy kezeń-kezeńmen 100%-ǵa deiin tehnikalyq bilimmen qamtý josparlanýda. Ol úshin memlekettik tapsyrys kólemi 50 myńǵa deiin kezeń-kezeńmen ulǵaiatyn bolady», - dedi ministr.
Onyń atap ótýinshe, kolledjderge akademiialyq derbestikti engizý boiynsha jumys qolǵa alyndy.
Búgingi kúni zańnamalyq deńgeide ýákiletti organnyń kolledjderde oqý merzimderin belgileýi týraly norma alyp tastaldy.
«9-synyp negizinde kolledjge túskender úshin oqý merzimin úsh jarym jyldan 2 jylǵa deiin jáne 11-synyp negizinde eki jarym jyldan 1,5 jylǵa deiin qysqartý josparlanýda. Bul naryqqa kadrlardy daiarlaý merzimin qysqartyp, onyń sapasyn arttyryp, bilim baǵdarlamalaryn jańartýǵa múmkindik beredi», - dedi Ashat Aimaǵambetov.
Sonymen qatar ol «Jas maman» jobasy aiasynda 180 kolledjdiń infraqurylymyn jańǵyrtý biyl aiaqtalatyndyǵyn aitty.
«Jobanyń qorytyndysy boiynsha árbir óńirde damyǵan materialdyq-tehnikalyq bazasy, jańa oqý josparlary men baǵdarlamalary bar keminde 7 zamanaýi kolledj jumys isteitin bolady. Jergilikti atqarýshy organdarmen birlesip, kolledjderdi senimgerlik basqarý tetigin damytýdamyz. Osy jumys ári qarai jalǵasady», - dedi ministr.
