Sýret: instagram.com/klmz_maker
Sarapshy Sábit Rysbaev ýtilalymdar jóninde daý bastalyp ketkeni týraly jazdy. Aitýynsha, ótkende kólik shyǵaratyn zavodtyń jumysshylary úndeý jasaǵan bolsa, búgin Qazaqmystyń jumysshylary úndeý jasapty. Jumysshylar otandyq avtoprom toqtasa bizdiń otandyq shikizat óndirýge de ziiany tiedi dep shyryldap otyr.
"Ýtilalymdar jóninde daý bastalyp ketti. Negizi ýtilalymnyń túpki maqsaty — otandyq avtopromdy qoldaý, otandyq avtopromdy jańartý bolǵan. 2022-niń qańtar aiynda ýtil alymdy 50%-ǵa túsirdi. Biraq kólik arzandamady. Sebebi kóliktiń baǵasyna áser etetin basqa da faktorlar bar. Kedendik rásimdeýden bastalady. Kóliktiń arzandaǵany Qytaidyń arqasy. Qytai baǵamen bárin túsirip tastady. Koreia da, Japoniia da Qytaimen jarysyp baǵany arzandatýǵa májbúr boldy. Áitpese bizdegi salyq arzandamady", - dep jazdy Sábit Rysbaev.
Onyń sózinshe, Ońtústik Koreia da basynda biz siiaqty kólikti qurastyrýdan bastaǵan. Keiinnen Kia, Hyundai-lar shyqty. Túrkiiada da, Ózbekstanda da negizinen ózderinen shyǵatyn kólikti minedi. Bizge otandyq avtoprom kerek. Qurastyrma emes, lokalizatsiiany kóbeitý kerek. Kóliktiń ishindegi qural saimanǵa otandyq ónimdi kóp qoldaný kerek. Ol jaǵyn basqasha oilaý kerek shyǵar, dep tujyrym jasaidy ol.
"Taiaqtyń eki ushy bar ǵoi. Ýtilalym toqtasyn deitinder oǵan balama da eshteńe aitpai jatyr. Ýtilalym toqtasyn, biraq kólikti ne isteimiz? Grýziia arqyly satyp alyp otyra bereiik pe? Myna jumysshylardyń da ashý yzalaryn tyńdaý kerek siiaqty. Árkimniń óz shyndyǵy bar", - dep túiindedi ol.
Aita keteiik, Qazaqmys kompaniia tobyna kiretin KLMZ ujymy úkimetke úndei tastady. Jumysshylar memlekettik organdar tarapynan jan-jaqty qoldaý qajettigin aitady.
"Mashina jasaý ónerkásibin ilgeriletýge qatysty jumystar áli de jetkiliksiz. Salada básekelestiktiń bolmaýy jańa zaýyttardyń ashylmaýyna, jas mamandardyń qoldaýsyz qalýyna, jemqorlyqqa jol berilýde.
Qazaqstan úkimetine otandyq óndirýshini qoldaý jáne damytýǵa qatysty sharalardy nyǵaitýdy, qazaqstandyq kásiporyndarynyń ósý men qatar jumysshylarǵa qolaily jaǵdailar jasaýdy talap etemiz", - deidi olar.
