QR IIM ákimshilik politsiia komiteti tóraǵasynyń orynbasary Serik Túsipov qaýipsizdikti saqtaý úshin kólikti qysqa qalai daiyndaý kerektigin túsindirdi, dep habarlaidy QazAqparat.
«Qystygúni minsiz júretindei kólikti daiyndap alǵan jón. Álbette, eń birinshi kezekte jazdyq dóńgelekti qystyq dóńgelekke aýystyrsańyz, ol jolda qaýipsizdiktiń saqtalyp, avtokóliktiń qozǵalys ótimdiligin arttyrýǵa sep bolady. Dóńgelektiń «tikenekti» nemese «úikelisti» túrin naqty aimaqtyń ereksheligine bailanysty tańdap alý kerek. Sonymen qatar dál qazir kóliktiń jylytý júiesiniń, syrtqa jaryq túsirý qurylǵylarynyń, tereze tazartqyshynyń durystyǵyn tekserip, akkýmýliator batareiasyn aýystyrǵan abzal», - dedi IIM baspasóz máslihatynda Serik Túsipov.
Onyń aitýynsha, kólik qyzmetiniń aqaýsyz bolýy qozǵalystyń jailylyǵy men qaýipsizdigin qamtamasyz etip, jol ústindegi qaýipti seiiltedi.
«Dizeldi otynmen júretin, jolaýshylardy nemese júkterdi tasityn avtokólikterge jeke toqtalsam deimin: aiazdy kúni orta jolda qalmas úshin jyl mezgiline sai sapaly soliarka quiǵan durys. Qys bastalysymen qutqarýshylar aidalada kóligi toqtap qalǵan júrgizýshilerdi qutqarýmen bolady, óitkeni olar qysqa arnalǵan soliarkanyń ornyna jazdyǵyn quiady. Osydan baryp ol qatyp qalady da kólik ary qarai júre almaidy», - deidi ol.
Serik Túsipov júk kólikteriniń syrǵyp ketýine jol bermeitin arnaiy qurylǵy bolýy kerektigin de eskertti. Ony júk kóliginiń júrgizýshileri uzaq ýaqytqa bir orynda, ásirese taýly jerde toqtaǵan kezde paidalanady.
