Qańtardaǵy tártipsizdikke qatysty kóliktegi politsiia 72 qylmystyq isti tergep jatyr. Bul týraly Ishki ister ministrligi Kóliktegi politsiia departamentiniń baspasóz qyzmetinen málim etti, dep habarlaidy QazAqparat.
Búgin Kóliktegi politsiia departamenti bastyǵynyń orynbasary Saryqul Jolanov 2022 jylǵy qańtar aiynda kólik nysandarynda bolǵan jappai tártipsizdikke qatysty qylmystyq isterdiń tergelý barysy jaiynda brifing ótkizdi.
Onyń aitýynsha, departament pen onyń aýmaqtyq bólimsheleri biylǵy 3-31 qańtar aralyǵynda jappai tártipsizdik boiynsha 72 qylmystyq is tirkedi. Bul turǵyda urlyq pen tonaý faktileri tekserilip jatyr.
Qylmystar boiynsha ýaqytsha ustaý oqshaýlaǵyshyna 14 kúdikti qamaldy. 31 qańtardaǵy jaǵdai boiynsha kólik nysandaryndaǵy keltirilgen shyǵynnyń aldyn ala somasy 530 792 668,8 teńgeni qurady.
Osy oraida kólik politsiiasy qyzmetkerleri kúdiktilerden 24 587 874 teńge somasyndaǵy urlanǵan múlikti tárkiledi. Sonyń arasynda 3 avtokólik, 5 uialy telefon, 2 299 825 teńge samasynda aqsha jáne quny 635 000 teńge bolatyn kiim bar.
«Narazylyq aktsiialary kezeńinde qylmyskerler memlekettik mańyzdaǵy eki nysanǵa zaqym keltirdi. Onyń qatarynda Almatynyń halyqaralyq áýejaiy men Almaty qalasy áýejaiyndaǵy politsiianyń jelilik bólimi bar. Sonymen qatar, áýejai ǵimaratynyń ishinde ornalasqan saýda nysandaryna da shyǵyn keltirildi», - dedi Saryqul Jolanov.
Onyń aitýynsha, qazirgi ýaqytta politsiia departamenti qyzmet kórsetetin aýmaqta jedel izdestirý is-sharalary jalǵasýda.
