Qazaqstan joldarynda kúnine orta eseppen 5-6 adam qaza tabady. Premer-ministr Álihan Smaiylov jaǵdaidy túzetýdi tapsyrdy, - dep habarlaidy Tengrinews.kz tilshisi.
Úkimet basshysy Qazaqstan jol qaýipsizdigi boiynsha álemdik reitingte 107-orynda turǵanyn atap ótti.
"Halyqaralyq sarapshylardyń baǵalaýynsha, aýyr aýrýlar men tabiǵi apattardan góri jol-kólik oqiǵalarynan qaza tapqandar kóp. Bizdiń elde jol-kólik oqiǵasynan qaitys bolý yqtimaldyǵy damyǵan eldermen salystyrǵanda 11 ese joǵary. Jalpy, elde barlyq kórsetkish boiynsha ósim baryn baiqap otyrmyz", - dedi Premer-ministr Úkimet otyrysynda.
Smaiylovtyń aitýynsha, segiz aida joldardaǵy apat sany 14 paiyzǵa artqan.
"Qaza bolǵandar sany 18 paiyzǵa ósti. Orta eseppen joldarda kúnine 5-6 adam óledi. Bul - túzetýdi qajet etetin óte kúrdeli jaǵdai. Álemdik tájiribede qaýipsizdikti baǵalaý úsh quramdas bólik boiynsha júrgiziledi: júrgizýshi - kólik - jol. Ókinishke qarai, bizde júrgizýshilerdiń kólik júrgizý mádenieti tómen", - dep qosty Smaiylov.
